Dili pakaaron-ingnon

Dunay mga kandidato nga maayo kaayong moulog-ulog sa mga botante samtang sila nangampanya pa sa ilang kandidatura.

Panahon nga makadaog na sila sa gitinguha nila nga posisyon sa kagamhanan, kalimtan na nila ang ilang gisaad sa mga botante.

Mao nga modayeg gyud ko sa mga nidaog ug anaa na sa pwesto sa kagamhanan nga wala gyud malimot sa ilang gipanghimo ug gipasalig kaniadto sa mga botante.

Unahon nako pagyukbo si kanhi kongresista Jose “Dodong” Gullas. Pagka kongresista ni Gullas sa first district kaniadto, gisuroy niya ang mga hilit kaayong dapit sa iyang distrito.

Hapit motulo ang luha ni Sir Dodong pagkakita niya nga ang mga bata sa usa ka dapit sa bukid sa Minglanilla, kinahanglan pa intawon nga moubog ug molabang sa sapa paingon sa tunghaan.

Gipasaligan ni Sir Dodong ang mga lumolupyo sa maong dapit nga patukoran niya og taytayan ang mao nga sapa.

Ang katawhan didto wala kaayo motuo kang Gullas kay nagtuo man sila nga pasalig ra kadto.

Gituman gyud ni Sir Dodong ang iyang gisaad, apan sa pagkahuman sa maong taytayan, dili na siya maoy kongresista, ang iya nang pag-umangkon.

Apan si Sir Dodong mibalik gyud sa maong hilit nga dapit ug nakig-atubang sa katawhan ug iyang giingnan nga dili managsama ang tanang politiko.

Didto giyukboan si Sir Dodong Gullas sa mga lumolupyo sa maong dapit.

* * *

Karon, akong daygon ang politiko nga susama og batasan ni Sir Dodong. Siya mao si Senador Bong Go, nga kaniadto gisaway gani sa ubang mga radio announcers tungod kay namolitika ra kuno sa iyang kanunay’ng pag-adto sa mga masunogan ug manghatag og hinabang.

Apan kapin sa duha ka tuig na nga midaog si Bong Go pagka senador, ug kanunay gihapon siya nga mobisita sa mga nasunogan.

Gani, diri sa Cebu kagahapon si Bong Go ug nanghatag og hinabang sa mga nasunogan sa tulo ka barangay sa siyudad.

Ayaw ko’g ingna nga namolitika lang gihapon si Bong Go aron siya botohan sa mga botante?

Aw kun namolitika man si Bong Go, usa ka maayong matang sa pamolitika.

Akong awhagon si Bong Go nga ipadayon gyud ang maayo niya nga kalihokan sa pagtabang sa mga nasunogan.

Suheto gyud ko sa pagka matinabangon ni Bong Go ngadto sa mga nanginahanglan og tabang kay ang akong maguwang didto sa Davao, usa sa iyang natabangan diha nga executive assistant pa siya ni mayor ug karon Presidente Duterte.