Nasayod na ko daan

Bisan sa wala pa mahitabo ang pagpatay sa mayor sa Clarin, Misamis Occidental dinhi sa dakbayan sa Sugbo, nasayod na ko nga tangtangon sa Camp Crame si Koronel Gemma Vinluan isip director sa Cebu City Police Office. Ang report nga miabot nako mao nga ang rason nga girelibohan si Vinluan mao ang kapakyas sa kapolisan dinhi sa Dakbayan sa Sugbo paghimo og hugtanay’ng kampanya pagsumpo sa mga ilegal nga sugal, ilabi na ang illegal swertres.

Dili ko moingon nga nakadawat og suborno si Koronel Vinluan, apan pakyas siya pagmando sa iyang mga sakop aron molusad og hiningusgang kampanya batok sa mga ilegal nga sugal.

Maayo kay nakakita og rason ang Camp Crame nganong ilang pulihan si Vinluan.

Leksyon kini sa mosunod nga hepe sa kapolisan dinhi sa Dakbayan, ug ilabi na sa regional director, nga dili gyud nila pasagdan ra ang mga ilegal nga sugal nga mokuyanap na og naghinan-aw lang sila.

May gamay’ng ideya na sab ko kun kinsa ang sunod nga opisyal sa kapolisan nga itudlo isip bag-ong director sa CCPO, kay kana si Koronel Geovanie Maines, Officer-in-Charge (OIC) ra man na.

Pero nindot ni Maines nga karon pa lang daan, mohimo siya og aktibo nga kampanya sa mga illegal swertres operators.

Grabeha lagi sa illegal swertres dinhi sa Sugbo uy, naglambigit og mga opisyal sa barangay, unya may mga proteksyon sa pipila ka opisyal sa kapolisan. Sa iyang suwat nga gipadala ngadto kang  Brigadier General Valeriano De Leon, ang bag-ong regional director sa Central Visayas PNP, si PCSO General Manager Royina Garma mihinganlan gyud sa mga dagkong grupo nga nagpadagan sa illegal swertres.

Dili na lang nako ibutyag dinhi, apan nasayod na ang kapolisan niini.

Ang suwat ni Ma’am Garma, naghingalan pa sa usa ka sakop sa Police Advisory Council (PAC) nga giingong nalambigit sa illegal swertres. Angay kini nga hingusgan sa pag-operate sa kapolisan.

Tiaw mo, si Mayor Edgardo Labella mihimo na og memorandum ngadto kang Koronel Vinluan sa wala pa siya relibohi, nga hingusgan ang kampanya batok sa mga ilegal nga sugal, apan wala gihapon siya magmugna og special team aron molutos sa mga operators sa anti-gambling.

Akong awhagon niini si Koronel Maines nga imando niya sa kapolisan sa tibuok rehiyon, nga mohingusog na sa kampanya batok sa ilegal nga sugal. Makamando man si Maines sa kapolisan tibuok rehiyon kay siya man gihapon ang deputy regional director for operations.