Makahilo nga kandila

Atol sa pagsaulog sa Adlaw sa mga Minatay ug sa Todos Los Santos, mipahimangno ang pundok nga Ecowaste Coalition sa publiko mahitungod sa mahimong kadaot sa panglawas nga makuha diha sa mga kandila nga adunay “toxic lead content.” Kinahanglan tamdan nato kining maong pahimangno kay basin baya ang dagkotan nga kandila ipahinungod na sa nagdagkot.  Simbako lang intawon!

Di na madutlan?

Mimando si Presidente sa NBI sa pagpangunay sa pag-imbestigar sa kamatayon sa Mayor sa Clarin, Misamis Occidental.  Kini nunot sa iyang pagtuo sa dakong posibilidad nga mga polis ra usab ang nagpaluyo sa pagbanhig sa mayor.  Dako kining tampaling sa aping sa mga kapolisan apan ang pangutana sa akong silingan, “Madutlan pa kaha sila og kauwaw nga naanad na man sila niana? Na hala, tubaga ninyo!

Senyales sa panahon?

Gikataho nga ang karne sa kuneho kon “rabbit meat” gibaligya na karon sa usa ka restaurant isip usa ka lamian ug maayong alternatibo nga pagkaon nga karne, kay gawas nga taas kini sa protina, ubos usab kini sa cholesterol, calories ug sodium content, mao nga makaayo kini sa panglawas.  Kasagaran kanato gimatoto sa pagtulon-an nga ang atong mga binuhi (pet) nga hayop dili nato dagmalan, labaw na’ng dili karnehon. Senyales na ba kining maong balita sa dagan sa panahon nga giingon sa bibliya? Nangutana ra!

Sistema batok kinaiya

Mimando si Cebu Governor Gwen Garcia sa pagpatuman og bag-ong sistema diha sa Cebu South Bus Terminal (CSBT) atol sa nagsingabot nga Kalag-kalag, diin ang publiko dili na makasayon-sayon sa pagsulod sa terminal gawas lang kon siya pasahero ug nga aduna na’y gihuptan nga ticket. Gibana-bana nga adunay 50 mil ka pasahero a ng mopauli unya panahon sa kalag-kalag.  Mosalir kaha ang maong sistema inig hasmag na sa maong gidaghanon sa pasahero nunot sa kasibot ug kagustuhan sa tawo nga makapauli gayod? Matod pa sa taga-Salot, “Balo lamang”!

Magpapili…bisan dili angay

Adunay balaodnon nga giumol karon sa Senado nga gihinganlan og Magna Carta for Barangay Workers nga maghatag na unya ug hustong suholan ingon man maghimo na nga regular employee sa mga barangay workers. Makaayo sa mga barangay workers ang maong balaodnon apan ato’ng malantawan nga modaghan na unya ang mosalmot sa piniliay gumikan sa maong benepisyo, bisan igo ra gayod intawon ang kandidato makapasar sa kwalipikasyon nga “maantigo’ng mobasa ug mosulat”.  Alegre unya ang eleksyon!