Wala matagbaw

Nisamot pagkamasalimuot ang sirkumstansiya sa pagpatay kang Clarin, Misamis Occidental Mayor David Navarro samtang anaa ilalum kustodiya sa kapolisan dinhi sa dakbayan sa Sugbo kaniadtong Biyernes sa hapon.

Mismong si Presidente Rodrigo Duterte ang wala na makasabot sa dagan sa inbestigasyon sa kapolisan. Gani, iyang pangagpas nga tingali ang kapolisan ra usab mismo ang nagpaluyo sa pagbanhig kang Navarro, kinsa padulong sa prosecutor’s office niadto’ng tungora.

Mao nang gimandoan ni Presidente Duterte ang National Bureau of Investigation nga maoy mosusi na sa pagpatay sa mayor, kinsa apil kaniadto sa listahan ni Duterte sa mga local officials kinsa nalambigit kuno sa negosyo sa druga.

Kinsa ba gayud ang nagpaluyo sa kamatayon ni Navarro? Adunay kalambigitan ba kaha ang iyang pagpatay sa akusasyon nga usa siya ka narco-politician? Sa atong nasayran, kaduha gayud ang mayor nga gialegar sa presidente nga miduwa kuno sa negosyo sa druga.

Laing anggulo nga mitumaw ang giingong kalambigitan ni Navarro sa dakong tulis sa J. Centre Mall sa dakbayan sa Mandaue, pipila ka adlaw sa wala pa siya niabot sa Sugbo.

Kini tungod sa mga taho nga aduna kunoy koneksiyon si Navarro sa Alferez robbery group nga nagbase sa Ozamiz City. Hinuon, kun atong susihon, hanas kadtong mga mamumuno ni Navarro. Kini tungod kay dili yanong mga killer ang makabuhat niadto. Kay klaro nga mga professional assassin kadto’ng mga mitira kaniya, mitumaw karon ang mga pagduda.

Ug kining mga pagduda nagpunting mismo sa kapolisan nga maoy responsable sa pagpatay kang Navarro. Dili ba nga niining gihingusgan nga gubat batok sa druga, kadaghanan sa mga gipatay nga mga dagkong personalidad gialegar man ngadto sa kapolisan?

Hinuon, sama sa naandan, mo-deny gayud ang kapolisan nga ilang binuhatan ang pagluthang kang Navarro.  Apan ambot kun mokubit ba usab ang katawhan sa basa na nila nga script. Hinuon, wala ko namasangil sa kapolisan. Usa lamang ako sa mga wala matagbaw sa ilang rason.