EDITORYAL - Maritime militia
Ang Pilipinas usa ka archipelagic nation, o nasud nga gilangkuban og mga isla nga gilibotan og kadagatan. Duna kini gibanabanang kapin sa 36,289 kilometrong baybayon sa tanang suok niini.
Lapad kaayo para mabantayan sa limitado kaayo’g mga maritime assets sa Philippine Coast Guard ug sa Philippine Navy gikan sa tanang hulga ug mopasipala sa kinaiyahan niini ug aron mabantayan ang seguridad.
Sa ubang mga nasud aktibo ang ilang gitawag og merchant navy. Mga barko kini sa mga commercial shipping companies ug fishing boats apil sab ang pribadong mga yati nga andam moserbisyo sa ilang nasud kun panahon sa gubat o katalagman.
Niadtong Mayo 1940 sa Ikaduhang Kalibotanong Gubat, diriyot mamasaker ug masikop sa German Army ang kapin sa 300 mil ka mga sundalong English, Belgians, French, ug Dutch nga nidepensa sa France.
Napugos ang Allied Armies pagatras apan nababoy sila paabanteng Germans sa atubangan ug dagat sa English Channel diha sa ilang likod.
Aron maluwas sila gikan sa hingpit nga kapildihan gilusad ang Operation Dynamo diha sa kadagatan sa Dunkirk. Apan dili paigo ang gidaghanon sa mga barko sa British Navy, French ug Dutch pagkarga sa miatras nga mga sundalo padung sa England.
Wala damha, natawo anang tungora ang merchant navy. Mga sibilyang mga barko, panagatan, yati, ug mga lantsa sa England boluntaryong niadto sa Dunkirk ug gihakot ang naparot nilang mga sundalo.
Tungod sa ilang gibuhat naluwas ug nakabalik pakiggubat ug nabuntog sa hingpit ang Germany paglabay sa tulo ka tuig.
Dinhi sa West Philippine Sea, gigamit sa China ang mga sibilyang panagatan hasta ilang mga commercial shipping isip maritime militia alang sa ilang interes.
Makiangayon lang usab ang pag-organisar sa tanang fishing boats sa Pilipinas aron motabang pagbantay sa teritoryo niini ilabi na sa agresibong mga gibuhat sa China karon.
Ang paghatag og importansya sa gobiyerno niining mga sibilyang mga panagatan makapadasig kanila pagbantay sa nasud kay sila 24/7 man naa sa dagat kay didto sila nanginabuhi.
- Latest
