Basag kotse mitokar na sab?

Adunay mga asawa, anak o higala nga kun hangyoon nga dili lang ilamba ang pultahan sa kotse inig sakay ug inig kanaog, mahiubos.  Usahay masakitan, mangaway.

“Ah, kadelikente sab nimong pagkatawo!” Yawyaw sa malditang misis ngadto  sa mister. Kini nagpasabot, nga maayo lang mosakay ang misis, unya dili kaantigo moamping.

Dili pareha sa mister. Nga halos kada adlaw mao gyoy mangunay paghugas sa ilang kotse. Labi na, kun brand new? Pastilan, basta mag-ulan, di gyod paulanan. Kay mahugaw! Bahalag mag-taxi na lang. Basta, dili lang mabasa ug magkalapok ilang sakyanan.

Unya, bisag mahal, sa kasa gyud ipa-regular check-up ang awto kada 3 ka bulan o matag 5,000 kilometers nga madagan, whichever comes first. Ingon niini kapinangga sa tag-iya ang ilang sakyanan.

Apan naunsa ba, nga sa miaging Oktubre 21, nakadawat og video footage akong anak pinaagi sa Facebook nga gi-share sa iyang amiga, diin usa ka kotse nga gibilin sa parking area sa usa ka mall, gibuak sa kawatan ang bildo sa bentana ug gihurot pagkuha ang mga valuables nga anaa sa sulod.

Kuno, katulo na kini mahitabo ngadto sa lainlaing sakyanan sa nagkalainlaing adlaw diha sa samang mall. Ang pait, kay dili manggilabot ang mall sa bayranan sa na-damaged ug sa nawala nga mga valuables bisag nagbayad pa ang hingtungdan sa mall’s parking area.

Ambot, aduna man untay guwardiyang mag-roving dinhi, ug nganong wa masakpi ning kawatana? May footage. Unya, nganong walay nadakpan?

Sa mga hingtungdan, walay usa nga mipa-blotter-sumbong niini sa kapolisan. Usab walay miduol sa media aron unta kini kuninitan pagpabuhagay sa tabiang mga mantalaan, radyo ug telebisyon, diin kadtong wala pa masayod, maka-bantay ug maghimog mga epektibong alternatibo aron sila dili maoy mahimong next victim.

Mga tag-iya’g sakyanan, ning panahon nga misamot kataas ang presyo sa inadlawng panginahanglanon, ang sakit sa mga tapolan - ‘basag kotse gang’, mitokar na sab.

Kun wala pay dash cam ang inyong sakyanan, hala, pataori!  Buwahan, masubay-klaro ang hitsura ning mga anino nga nagpakabuhi sa kangitngit.

Unya, ayawg salig sa mall. Ikaw gyod ang mo-report ini sa otoridad.

Ug kon gusto kag short cut, sige, ipa-Duterte dayon! Siyarog dili ipatokhang ning mga kawatan!