Ang panaw padung sa Lanipga

Sa ikaduhang higayon gihimo nako ang panaw alang sa binuwan nga Misa padulong sa Lanipga. Hataas ang maong lakaw padung sa maong dapit.

Naglagiting ang kainit ni Haring Adlaw mao nga misamot og kalangay ang tanan. Makutas ang maong panaw.

Apan bisan pa niini padayong gipaningkamotan nga mamahimong hapsay ang tanan.

Hinuon ang kaakitbo sa katawhan usa naman ka dakong dugokan aron sa gihapon magpasalamat ang sama kanako nga nakakita kanilang nipaambit sa ilang kaugalingong pagkatawo mahatagan lamang og katumanan kining maong panagtagbo tali sa Dios ug sa tawo diha sa Sagrada Eyukaristiya.

Sa laing bahin may misulod sa akong alimpatakan sa dihang gihimo ko ang maong panagtagbo. Kini naglangkob ning mosunod:

1. Dili mabuhi ang tawo nga mag-inusara. Ang panaw kuyog ning mga tawhana usa naman ka dakong pakigtambayayongay ug panaghigalaay.

2. Diha sa panaw dili tanang dalan sayon ug hapsay adunay dalan nga malisud ug tungason kaayo. Mao nga ang bugtong paagi sa pagsubay niini mao man ang pagdawat sa kamatuoran nga ang kinabuhi dili patas.

3. Ang kinabuhi sugilanong hiwi ug gani ang tawo daw sama sa lapis nga mahimong tanuson sa Dios taliwala sa badlis nga hiwi.

4. Ang kukabildo diha sa kalaay sa panaw kinahanglanon aron ang matag perigrino kun magpapanaw mabuhi.

5. Human sa makutas nga panaw anaa ang pagpahuway. Kun wa pa unta ang schedule kaayo untang ihumol sa kankalanog falls.

Salamat sa Lanipga. Lisud man tuod ang dalan apan nakita ko ang bili sa pasingot nga walay pagkabanhaw kondili kita moagi una sa malisud nga kalbaryo sa pag-antos.