Romano Katoliko

Sa pagsige ko’g basag Bibliya, nabangalan ko ang pagsukna ni Hesus kang Pedro: “Pedro, gihigugma mo ba ako?” Mitubag si Pedro: “Oo, Ginoo sayod ka gayod nga gihigugma ko Ikaw.”

“Kun mao, pakan-a ang akong mga karnero.” Dasig-sugo ni Hesus.

Katulo pangutan-a ni Hesus si Pedro aron pagsukod kon nagmatinud-anon na ba kini. Nakasinati na si Hesus og pagpamakak ni Pedro. Niadtong gidakop Siya sa mga Hudiyo, wala pa gani makatuktugaok ang manok, katulo na Siyang gilimod niini.

Gituyo ni Hesus nga buhaton Niya kini tungod kay miabot nang yugto nga himoon si Pedro ni Hesus nga bato sa dili pa Siya mobalik sa Langit.

Kahinumdoman nga usa niana ka higayon, atubangan sa mga apostoles, giingnan Niya si Pedro: “Ug karon nag-ingon ko. Ikaw si Pedro (ang Bato) ug niining batoha tukoron ko ang akong simbahan. Ang mga gahom sa impiyerno dili makabuntog niini.”

Ang bato nga ipasabot ni Hesus dinhi, mao ang kasinatian nilang apostoles sa pagsabwag sa Maayong Balita ug sa mga pulong sa Diyos. Ug ang simbahan nga Iyang tukoron, mao kanang simbahan sa Vatican City, diin ang mga nanimbahay mao ang mga karnerong giingon ni Hesus nga paalimahan ni Pedro ug pakan-on sa pan sa kinabuhi, diin kinsa ang makakaon dili na mamatay.

Gituman ni Pedro ang sugo ni Hesus. Namatay siya nga nahimong unang santos ug unang pope sa Romano Katolikong simbahan. Gilubong siya ilawom sa altar sa St. Peter Cathedral, Vatican City, Rome, Italy.

Ug sukad niadto hangtod karon gipadayon sa misunod niyang kaparian ug mga pope ang misyon nga gibilin ni Hesus kaniya.

Mga lig-ong kamatuoran, nga ang Romano Katoliko maoy giingon ni Hesus: “Niining batoha (si Pedro maoy Iyang gipasabot) tukoron Ko ang Akong simbahan, diin ang mga gahom sa impiyerno dili makabuntog niini.”

Hinungdan, nga sa gibanabanang 4,200 nga mga relihiyon sa tibuok kalibotan, bisag giunsa pa pagsaway ug pagpanamastamas sa ubang mga tinuohan ang Simbahang Katoliko, kini nagpabiling lig-on ug wala gyod mapukan. Ngano? Kay si Hesus, mismo, ang nagpa-patukod niini.

Busa, may diyosnong pundasyon ang pag-ila sa Roman Catholic nga the most genuine and best religion all over the world.