Taklobo ang bag-ong Ivory

Niadtong Miyerkules nasakmit sa composite team nga gipangulohan sa National Bureu of Investigation ug sa Bureau of Fisheries and Aquatic Resources ang mga giant fossilized clam o bagal sa Taklobo.

Kini atol sa ilang operasyon sa duha ka barangay sa lungsod sa Cordova diin nadakpan ang tulo ka mga tawo.

Sa bana bana sa mga otoridad mokantindad sa 36 milyones pesos ang naasoyng mga taklobo diin mopresyo og tag 18 mil pesos ang kada kilo.

Matud sa mga dinakpan nga gikan kuno sa gipang dump nga anapog ang nakuha nga mga bagal sa taklobo busa ilang gipangkuha.

Wala kuno sila masayod nga bawal kini maong nakugang sila dihang gipangdakop ug gipasakaan og kaso.

Naengganyo sila nga magtipig sa mga bagal sa taklobo kay namasin nga mahalin sanglit naay nagpasalig kanila nga naay buyer nga mopalit.

Samtang gipakita sa NBI nganong daghan ang nag interest sa mga bagal sa taklobo diin giproseso kini sa usa ka gam-anan didto sa China.

Gihimong mga mahalon nga muebles, alahas ug uban pa nga mahimong ikabaligya sa mahal nga presyo.

Gani mao na kuno kini karon ang gihulip sa elephant tusk nga higpit nang gidili busa ang mga fossilized clam ang gigamit sa gustong makakwarta.

Kaniadto ang mga elepante pamatyon kay kuhaon ang mga tango niini kay himoong ivory o garing maong hugot na kining gidili kay mahurot ang mga elepante tungod sa kahakog sa mga tawo.

Tungod kay makwartahan man ang mga bagal sa taklobo moang daghang mga tawo ang nag interest na niini karn.

Busa gihingusgan sa kagamhanan ang pagproteher niini kay usa kini ka bahandi sa kadagatan nga gikinahanglang panalipdan.

Kung itandi ang bagal sa taklobo ug tango sa elepante mas ok ra seguro ang taklobo kay fossilized naman kini o nahimo nang bato.

Mahimo ra segurong tugotan apan i-regulate o dunay lagda kun asa ra kutob ang pagpanguha niini.

Magsilbeng pahimangno kini sa mga tawo nga dili nalang gyud magtinguha nga madatu kon bagal naman lang sa taklobo ang tinguhaon nga mabaligya kay basin mahisama mo sa mga tawong nadakpan.

Looy baya intawon ang mga napriso kay mga kabus ug pamilyado kinsa mao ray gisaligan sa ilang mga anak.

Apan naa may balaod nga gikinahanglang ipatuman nga angayan lang usab sundon.