Sex without love is lust

Sa miaging Oktubre 16, adlaw sa kapistahan (feast day) ni Saint Gerard Majella, natawo sa Abril 6, 1726 sa gamay’ng lungsod sa Muro, Southern Italy ug namatay sa nagsingabot nga tungang gabii sa October 15, 1755 tungod sa sakit nga hemorrhage ug dysentery.

Sa buhi pa siya, ubay-ubay nang milagro ang nasaksihan ug nasinati sa katawhan gikan niya. Ug napun-an pa kinig daghan sa namatay na siya.

Gibayaw siya isip beato ni Pope Leo XIII sa tuig 1893 ug nahimong santos pagka Disyembre 11, 1904 panahon ni Pope Pious X. Giila Siyang Santos sa mga inahan ug ‘il santo dei felici parti’ or the Saint of a Happy Childbirth.

 Magtiayong wala matugahig anak, nangayog tabang niya nga unta magkaanak, nakaanak. Mahal ni Saint Gerard ang kinabuhi sa tawo. Labi na ang bag-ong kinabuhi nga nahulma sa sabakan.

Usa ka redemptoristang mangangalagad si St. Gerard. Mao nga sa miaging Miyerkules, Oktubre 16, siya ang nahimong dugokan sa wali sa pari.

Nahisgotan sa pari ang mga maayong buhat ni St. Gerard ug gitandi sa makalilisang nga panghitabo dinhi sa ato matag adlaw, diin nauso ang patay, lugos, inhustisya, korapsiyon, aborsiyon, premarital sex ug uban pang matang sa salawayong kinaiya nga gidili sa atong Magbubuhat.

“Sex without love is lust.” Matud pa sa pari, nga nakapaigking sa nakadungog ug nakapahinuklog sa nakasabot sa kabug-at nga mensahe niini. Halos tanan, nangaigo! Naha-dart pa, Bulls eye!

Bitaw. Gikan sa mga tin-edyer nga maghigugmaay hangtod sa nag-live in partners nga natigulang na lang pagsige’g enjoy sa pre-marital sex; sa mga bana o asawa, kinsa bisag may kabilinggan na sa kinabuhi, mopatilaw ug motilaw lang gihapog lain; ug sa mga dukirok, kinsa bisag may edad na, padayon gihapong nangomprag sex for sale didto sa kahilayan, pipila lamang kini ka matang sa pagpakighilawas nga maoy giingon ni Father, “Sex without love is lust.”

Timan-i. Bisag kinsa ang mag-sex nga wala hiusaha sa kaminyoon, wala gyuy gugma diha sa ilang panaghilawas. Kay ang pre-marital sex gidili sa Ginoo. Busa, usa ka mortal sin. Ug gikonsedirar nga lust (kahakog sa unod) kun ang sex adto buhata sa dili lehitimong bana o asawa.