EDITORYAL-Only in the Philippines!
Tulo ka tuig na ang nakalabay human natapos ang national elections, apan hangtud karon duna pay mga election protests gikan sa local level ug national level ang wala pa gihapon maresolba sa mga hingtungdang ahensya. Dili malilong kining init kaayong election protest sa naparot nga si kanhi senador Ferdinand “Bongbong” Marcos batok sa nakadaog nga si Bise Presidente Leni Robredo diha sa Presidential Electoral Tribunal (PET).
Niadto pa untang Oktubre 15 gipaabot nga mopagawas og desisyon ang PET bahin sa protesta ni Marcos, apan nauktaba lang gihapon. Hangtud kanus-a man kaha matapos kining protestaha?
Nigawas naman sa initial recount nga kadtong gipiling mga probinsya sa Bangsamoro Autonomous Region of Muslim Mindanao nga si Marcos mismo ang nag-ingong didto siya gitikasan, wala madugangi iyang botos.
Ang mga abogado ni Robredo miinsister nga angay ipatuman ang Rule 65 sa PET nga nag-ingong ibasura ang protesta kun makita sa initial recount sa tulo ka probinsyang giingong didto may nahitabong tikas wa gyud makadugang og botos sa nagprotesta.
Apan inay nga sundon ang maong patakaran, nagdikidiki pa gihapon ang PET pagbasura sa protesta ni Marcos. Gani gusto na sab ni Marcos nga ipatan-aw ang ubang mga probinsya nga nagtuo siyang didto gitikasan sab siya ug kun may makitang iregularidad, kinahanglang himuong imbalido ang tanang botos didto, apil na niini ang kang Robredo.
Murag lain pud kaayo nga tungatunga sa duwa usbon og kalit ang rules dili ba? Kun ingon niini ang sistema, aw maabtan og siyam-siyam ang pagresolba sa protesta ni Marcos. Angay sab hinumdoman nga kun pananglitan tugotan sa PET ang bag-ong argumento sa kampo ni Marcos, may katungod baya nga modangop sa Korte Suprema si Robredo.
Molanat na sab ni og pipila ka bulan ayha pa malihok apan ang padulngan ibalik ra gihapon pag-review sa gihimo sa PET.
Si Robredo duna ra ba sab kaugalingong counter-protest, unya mao gihapon kini unya kadugayon ang latasonon sa PET, maabtan gihapon og tulo ka tuig! Sakto nga human na iyang termino. Only in the Philippines!
- Latest
