Best is not enough

Usa ang lungsod sa Carmen, Cebu sa dose ka mga local government units sa Central Visayas nga napakyas o failure sa pagpatuman sa road clearing operation.

Kini human migawas ang validation sa Department of Interior and Local Government DILG nga moau gitahasan sa presidente paghawan sa mga agianan gikan sa tanang mga obstruction.

Apan inay maluya nga wala makapasar mibangon ang Carmen aron makapasar na sa sunod nga validation kun mahatagan man ugaling sila og second chance.

Kini tungod kay matud pa sa DILG mag atubang man og silot ang mga LGU nga mahagbong.

Hinoon hatagan pa sila og show cause o ipa explain nganong failure ang ilang implementation.

Nahinabi nako si Carmen Mayor Carlo Villamor sa telepono kinsa mipasabot nga gihimo na nila ang tanan aron unta makatuman sa gipangayo sa nasodnong kagamhanan apan subo palandungon nga wala gihapon kini makalusot nga kon sa kanta pa ang ilang best is not enough.

Busa naghiusa ang Carmen LGU uban ang kapolisan ug ubang ahensya sa pagbungkag sa tanang obstruction sa kadalanan.

Gamit ang heavy equipment gi demolish nila apil na ang mga estraktura sa Purok kada baranggay gitilok gyud aron seguradong mahawanan.

Ang nasinati sa Carmen sama usab sa ubang mga LGU nga nakugang sa resulta sa validation sama sa Carcar City, Badian ug uban pa nga nangayaghong usab.

Kun wala matagbaw sa sinugdanan ang nasodnong kagamhanan, seguraduhon na gyud sa sunod nga makapasar na o mas maayo nga high compliant na.

Unsaon man nga mao man kini ang gimbut-an mismo sa presidente busa kinahanglan gyud nga masunod.

Gani ang Cebu City nga bisan nahawan ang mga nag unang agianan sa Colon, N. Bacalso ug Omeña Boulevard medium compliant lang tungod kay naa pa may ubang agianan nga namalik ang mga vendors nga ang mga otoridad lang ang gibantayan. Ang tutokan karon sa mga LGU ang pagsustiner sa programa kay dili gihapon sila makalusot ugaling i-unya unya ang pagpatuman.

Anugon kaayo kon makawang lang ang paningkamot nga nalimpyo na unta apan nibalik ra usab sa naandan.