Way pulos

Gideklarar sa hunta probinsiyal sa Sugbo ang krisis sa trapiko dinhi sa lalawigan atol sa ilang regular nga session niadtong Lunes. Ang direklarasyon gihimo pinaagi sa resolution ni Bokal Glenn Soco. Iyang giawhag ang nasudnong kagamhanan nga mangita solusyon sa dakong krisis nga iyang gihulagway nga miresulta og P1.1 bilyones nga alkansi sa ekonomiya sa Sugbo matag-adlaw sigun sa gihimong pagtuon sa Japanese International Cooperation Agency (JICA).

Pipila sa mga gitumbok niyang rason sa hinungdan sa trapiko mao ang mga pagbaha, kakuwang sa edukasyon sa mga driver sa hustong lagda sa pagmaniho, ug ang mga nakababag sa karsada. Apan unsa bay kapuslanan sa maong deklarasyon?

Ang labing tinuod hungaw ug way epekto ang maong deklarasyon gawas lang sa atensiyon nga nakuha ni Soco gikan sa media. Dili makatabang pagsulbad sa problema sa trapiko ang pagdeklarar niini nga usa na ka krisis kun way konkretong buhaton ang kagamhanan.

Dili deklarasyon maoy kinahanglan aron masulbad ang problema kun dili pagpangita sa hinungdan uban ang plano unsaon nga masolusyonan ang problema ug ang labing  importante mao ang implementasyon sa plano.

Kun kutob ra sa awhag sa nasudnong kagamhanan, wala tay solusyon nga mapaabot sa maong problema. Kini tungod kay hangtud ron nagkapuliki ang national government unsaon pagtubag ang problema sa trapiko didto sa Metro Manila.

Dugay na nga nasayod ang lokal nga mga opisyal sa problema ug sa hinungdan niini. Apan ang nakaparat mao ang kakuwang nila og political will.  Usa sa mga hinungdan sa trapiko mao ang mga nakaali sa karsada—tricycle, habal-habal, illegal parking, vendors, ug uban pa.

Sagad sa mga lokal nga opisyal molingiw niining maong mga hinungdan sa trapiko tungod sa politika. Mahadlok sila nga mawad-an og botante sa mosunod nga eleksiyon. Hinaut nga niining kamanduan karong bag-o nga hawanan ang mga sidewalk ug ang kadalanan nga maluag-luag ang trapiko.

Usa sab diay sa akong nabantayan nga hinungdan sa pagkabara sa trapiko mao ang mga proyekto sa Department of Public Works and Highways (DPWH) nga labihan kadugay mahuman. Maayo tingali nga himoong polisiya sa mga local government units nga pugson ang mga contractor nga dili biyaan ang ilang proyekto hangtud mahuman. Ang nahitabo karon mao nga gub-on daan ang karsada ug balikon lang kanus-a nila gusto.