Pasalamat

Oktubre 13, 2019: Ikakawhaag-Walo
nga Domingo sulod sa tuig (Indigenous People Sunday)

Mga Pagbasa: 2 Har. 5;14-17/Sal. 98/2 Tim. 2;8-13/Lk. 17;11-19

Dio Lodare, nagkahulogan kini og Praise the Lord! Alang sa unsa? Tungod sa daghang mga grasya nga atong nadawat angayan lamang nga ato siyang daygon ingon man sab siyang pasalamatan. Kini ang gihimo sa usa ka sanlahon nga naayo gikan sa iyang sakit nga sanla. Apan wala kini magpasabot nga ang siyam nga mga naayo dili magpasalamat. Buot gihapon silang magpasalamat. Most likely ang siyam mga Hudiyo ug natural kay si Jesus Hudiyo man dunay mga daghang kahigayonan nga sila magkakita pa pag-usab aron sila makapasalamat. Kaniya kun sila magkatagbo na. Sa laing bahin ang maong Samaryanhon maglisud na pagpasalamat tungod kay siiya langyaw ug gani dili maayo og relasyon sa mga Hudiyo mao nga nibalik gyud siya og nihimo sa maong pasalamat. Managsama silang dunay tinguha apan sugo sa kustombre bugtong ang Samaryanhon lang ang nibalik diha diha.

Apan sa laing bahin, nindot kaayo ang gipakitang sanglitanan sa maong Samaryanhon nga human maayo sa iyang sanla ang nibalik gyud aron pagpasalamat. Ang pagkamapasalamaton gikinahanglanon kaayo aron sa ingon mamahimong mas makahuloganon pa ang atong kinabuhi. Kini nagpasabot ning mosunod:

1. Ang pag-angkon nga dili tanan atoa busa angayan lamang kitang magpasalamat sa Dios tungod sa mga maayong butang nga iyang gihatag kanato.

2. Bugti sa maong kahinangop tungod sa mga maayong mga butang nga atong nadawat ato kining ipaambit ingon nga maayong balita nagdto sa uban.

3. Ang pagpasalamat nagpasabot usab og pagkamanggihatagon dili lang sa bisan unsang materyal kondili labaw na gyud sa atong kaugalingon. Kay ning paagiha nahimong mas makita sa kadaghanan kondili nimo tipigan lamang sa imong kaugalingon ang maayong nahitabo kanimo.

Ang imong kasinatian angayan lamang ipaambit aron sa ingon sama nimo ang uban usab malipay ug madasig. Ang maong Samaryanhon human siya maayo seguro ang mipaambit ning maong kasinatian ngadto sa ubang mga tawo.