EDITORYAL - Way krisis sa transportasyon

Dul-an upat ka oras o tulo ka oras ug traynta y uno minutos pagbalhin-balhin og upat ka mga public utility jeepney ayha pa naabot si Presidential Spokesman Atty. Salvador Panelo kagahapong adlawa sa pagtrabaho niini sa Malacañang.

Gibuhat niya kini aron pamatud-an nga way krisis sa transportasyon ang Metro Manila nga giinsister sa mga kritiko mao nga nag-commute siya padung sa trabaho.

Ang iyang biyahe nabantayan sa pipila ka netizens ug ang uban nagpa-picture pa ug ni post sa twitter.

Dunay say higayon gikasakay niya ang mga sakop sa media nga ni-cover ug may pipila sab ka mga sakop sa militanteng pundok nga nakasakay niya sa iyang mga pagbalhinbalhin og PUJ gikan sa Marikina City diin siya magpuyo, padung sa Malacañang.

Sumala pa sa report sa Philstar.Com, base sa gikutlong mga post sa twitter post sa iyang mga nakasakay, alas 5:15 sa kaadlawon kini migikan sa Marikina City ug naabot siya sa Malacañang alas 8:46 na sa buntag.

Late na siya og 46 minutos. Apan siya miingon nga 24-oras ang trabaho nilang mga opisyales sa gobiyerno.

Sa pagsulod palang sa Malacañang grounds wala siya makasakay og traysikol kay niangkas nalang siya’g sibilyan nga motorsiklo pasulod.

Hapit upat ka oras siya nga nibiyahe pag-commute. Lahi ra kun nagsakay siya sa iyang opisyal nga sakyanan nga duna pa tingali ‘wang-wang’ padung sa Palasyo.

Apan miinsister pa gihapon si Panelo nga walay krisis sa transportasyon. Kinahanglan lang gyud nga mosayo og bangon ang mga tawo aron dili matanggong sa traffic padung sa trabahoan.

Ang mga ordinaryong tawo kada adlaw mosungasong niini, usahay mas grabe pa.

Upat ka oras padung ug laing upat ka oras pauli human sa walo ka oras nga trabaho?

Pila nalang may oras pahuway ug pakiguban sa pamilya sa mga yanong empleyado? Nakasabot ba kaha siya sa iyang gipanulti?

Lisod ipamugos ang butang kung dili gyud gustong dawaton, mao nga lisud sulbaron ang problema kung ang mismong hingtungdan dili moangkon nga dunay problema.