Makalipang, ako ug ang minatay

Alang sa mga parokyano ang terminong MAKALIPANG dili gyud nila hikalimtan. Bisan asang parokyaha anaa kini siya. Acronym kini siya sa MAAYONG BALITA, KASINATIAN, LIHOK UG PANGAMUYO.

Magsugod kini pinaagi sa pag-ampo dayon basahon ang ebanghelyo alang sa sunod Dominggo human sa maong pagbasa mohimo dayon og paambitay pinasikad sa kasinatian.

Human sa pagpaambit mao dayon ang pagtuki sa mga problema o uban pang  mga concerns nga angayang hatagan og igong pagtagad sa selda members dayon tapuson na pud kini og pangamuyo dayon buwag alang sa mga nagkadaiyang mga buluhaton. Hinuon sa uban isulod pud apil ang mga income generating projects agig pagbulig sa mga panginahanglan sa grupo.

Dinhi sa amo sa parokya ni San Jose sa Sangi, Alegria among gihimo dinhi ang mortuary assistance alang sa mga namatyan. Dunay lungon nga sarang magamit, hatagan usab og misa sa balay sa namatyan ingon man dunay pagtambayayong sa katawhan sa Dios, matabangan lamang ang nanginahanglan.

Sa akong bahin usa pud sa akong kahigayonan nga makigsandurot sa mga namatyan kun moadto gyud ko sa ilang mga pinuy-anan. Hinuon gikinahanglan pa gyud nga isilsil ang husto nga pagsabot nga ang Basic Ecclesial Communities dili lang diay mahitungod sa mga proyekto kondili mahitungod usab kini sa pulong sa Dios nga maoy pinakamahinungdanon sa tanan.

Sa akong kasinatian sulod lamang sa pipila ka mga bulan nigitib ang dakong kaikag nga maningkamot alang sa kaayohan sa kadaghanan. Daghan ang uhaw sa Pulong sa Dios, daghan ang uhaw sa presensiya sa Simbahan ug daghang uhaw usab nga unta mahatagan og kasulbaran ang ilang mga suliran.

Mahimo kining sulbaron dili tungod kay superhero kita kondili posible kini kun magtinabangay lang gyud ang tanan dinuyogan sa husto ug makatarunganong sistema.

Nisulod ko sa karaang simbahan ug nakita ko ang naglaray nga mga lungon nga sudlanan sa mga patay’ng lawas. Sa akong bahin, nakaingon ko nga way nada ang pagpuyo sa hamubo nga kinabuhi kondii man gani kita maantigong mopaambit sa bisan unsa nga nia nato.

Ning paagiha mas dali ug makahuloganon ang paghatag kon anaa lamang ang hustong pagsabot sa kamatuoran nga ang tanan nga atong nahuptan dili diay atoa.