Labella naipit sa duha ka obligasyon

“Wowww, nindot na agian ang mga aseras sa dakbayan sa Sugbo. Dili na masangit ang palad sa nanglakaw ngadto sa misiwil nga abusadong lamesa sa mga sidewalk vendors.”

Mga pasalamat tuaw sa kinabag-ang concerned citizens, kinsa nakadayeg-lipay sa maong aksiyon.

Ang aseras gamayng dalan nga gidesinyo para laktan sa pedestrian.

Ug dili alang sa mga tindahang pungkopungko nga bisag unsaon pa sa pagpahimutang, makaali gyod sa agianan.

Husto ra kaayo ang pagmandar ni Pres. Rodrigo Duterte sa kinatibuk-ang LGU nga limpiyohan ang tanang nagkamuritsing sidewalk ug aseras aron hingpit kining mahibalik ngadto sa katawhan.

Ug saludo ko ni Mayor Ed. Kay bisag sakit sa iyang buot ang pagbuhat niini, gisunod gyod niya ang order ni Duterte.

Mapinanggaon si Ed. Naluoy siya sa naapektohang sidewalk vendors, kinsa sa mangihawaong pamayhon, mipalanog sa ilang sentimento didto sa Plaza Sugbo niadtong Oktobre 1, nga kuno nawad-an silag kapanginabuhian ug gustong mobalik pagpaninda didto sa bag-ohay lang nakaginhawag tarong nga mga aseras.

“Unya, gusto ba diay mong masuspenso ko?” Pangutana ni Ed ngadto sa mga vendors kinsa nagdalag plakards, diin  klaro kaayong nagpiit sa mayor sa duha niya  ka managsumpaking obligasiyon: 1) ang pagtuman sa sugo ni Duterte ug 2) ang paghatag og balik sa naandang kapanginabuhian sa mga apektadong vendors.

Dinhi masukod unsa kamanggihunahunaon si Ed ngadto sa tanang linalang nga nahilambigit sa iyang pagpangalagad isip amahan ning atong dakbayan.

Misaad siya nga pangitaag laing dapit ang mga naniyabawng vendors.

Pero, nganong mamugos man gyod sila nga mobalik sa aseras nga nakasupak man kini sa kamandoan ni Duterte?

Nagpasabot ba kini nga ang mga vendors dili kaantigo motuman sa balaod gikan sa kinatas-ang lider? Unsa na kaha, kon pipila kanila tugtan na sab ni Ed pag-estar sa ilang kanhi puwesto? Dili kaha sila moabuso?

Nganong hilig man gyod ang tawo mobawog sa balaod hangtod nga ang balaod mahimo nang dili balaod? Mao baya kini ang source of all evils like illegal drugs and corruption. Unya, ato pang pun-an?

Mayor Ed, mas nindot kon mahatagan ang vendors og tukmang relocation site kay sa ibalik sila sa sidewalk o aseras. Ang balaod, balaod. Busa, angayng sundon!