EDITORYAL - Wa nay rason

Wa nay rason ang kagamhanan sa dakbayan sa Sugbo nga dili i-relocate ang mga gibanabanang 700 ka mga informal settlers nga anha namuyo kilid sa mga kasapaan.

Ang ilang pagpuyo sa maong mga dapit nagbutang sa ilang kaugalingon sa makuyaw nga sitwasyon tungod kay posible silang banlason padung sa dagat kun mosaka ang tubig panahon sa tinguwan.

Ang gobiyerno mihatag na og P140 milyones nga pundo nga gipaagi diha sa DPWH Central Visayas sa panahon pa sa nakalabay nga administrasyon sa dakbayan.

Mao nga kinahanglang paspasan dayon sa siyudad ang paghikay niini kay giingon nga mabalik ang maong pundo sa panudlanan sa gobiyerno kun dili kini gamiton sa dili pa ang bulan sa Disyembre.

Ang mga informal settlers pabiling nagmagahi pagpahawa sa ilang gipuy-an bisan pa man sa hangyo ug mando alang sa ilang kaluwasan.

Ang rason, wala silay kabalhinang dapit tungod kay walay relokasyong luna nga gitagana para kanila. Ang DPWH hagbay rang nangayo og tabang sa siyudad pagpa-relocate sa mga informal settlers aron masugdan na ang flood control project niini.

Ang maong mga molupyo mao usab ang pipila sa gibasol kun nganong daghang mga basurang natam-ok sa mga kasapaan sa siyudad kay lagi siya may nagpuyo sa mga dapit diin nakita ang daghang mga basura atol sa mga gipahigayong river cleanups.

Karon nga duna na diay pundo para sa ilang relokasyon nagpasabot na ba kini nga wala nay makitang mga informal settlers sa kilid sa mga sapa sa umaabot nga panahon? Depende.

Kini tungod kay duna nay mga hitabo nga bisan gi-relocate na ang mga apektadong pamilya mamalik man gihapon kay lagi ang ilang panginabuhian naa sa siyduad.

Anhing dapita na makita kun molihok ba gyud ang mga opisyales sa barangay kay sila maoy labing unang nasayod kun kinsa ang mga nagpuyo sa ilang mga dapit.