Sayop nga plaka

Nalipay ko kay taudtaud na gyud nga wala na ko makadawat og reklamo gikan sa mga driver kabahin sa pagkuha nila og mga plastic ID type driver’s licenses.

Niini, pasalamatan nako si higalang LTO-7 Regional Director Vic Caindec kay naninguha siya nga makaisyu na og mga plastic-type nga driver’s licenses ang mga opisina sa LTO dinhi sa Metro Cebu.

Dihang gitugotan na nga makaisyu og plastic ID-type drivers license ang mga opisyal sa Land Transportation Office sa Robinson’s Fuente ug SM City, nasulbad na gyud ang problema sa mga driver.

Kaniadto gud, ang mga LTO district offices sa Talisay, Carcar, Mandaue ug Lapu-Lapu maoy punsisokan sa mga tawo.

Karon, daghan na sila og kaduolan kay makaisyu na man og plastic driver’s license ang sa Robinson’s Fuente ug SM City, ug paspas pa kaayo.

Usbon ko, atong pasalamatan si Director Caindec niini.

* * *

Pero, hangtud karon, naglibog ko nganong daghan man gihapon nga mga sakyanan nga migamit og dili mao nga temporary plate numbers? Ug ngano nga wala man sila pangdakpa sa LTO?     

Ang gipasabot nako mao ang mga sakyanan nga gigamitan og plaka nga sama sa 070105; 060103;020604.

Dunay ko’y duha ka sakyanan nga gipangayoan og authority sa paggamit niya sa maong matang sa plaka.

Pastilan, ang LTO-branch man maoy mihatag og pagtugot niini? Wala diay mo masayod sa balaod kabahin sa paggamit og temporary plate?

Ang lagda niini nga kon wala pa’y original plate, ang brand new nga four-wheeled nga sakyanan mogamit ra sa iyang Conduction Sticker Number isip temporary plate.

Unya, ang mga motor, mga used imported ug mga rebuild nga sakyanan, ang gamiton niini isip temporary plate mao ang iyang Motor Vehicle File Number, sama sa 0701-236765, ug dili ang 070314 nga maoy code sa paglukat sa rehistro.

* * *

Ang Philippine Statistics Office (PSA) nagsaulog diay karong buwan sa Oktubre sa National Statistics Month ug daghan sila og giandam nga mga kalihokan, usa niini mao ang tulo ka adlaw nga 14th National Convention on Statistics nga tua gihimo sa Crown Plaza Manila Galleria hangtud karong adlawa.

Matud ni Noel Rafols, ang public information officer sa PSA-7 dinhi sa Central Visayas, ang kalihokan karong adlawa didto sa kaulohan, pagatambongan ni Vice President Leni Robredo ug ni NEDA Secretary Ernesto Pernia.

Sigurado sab gyud ko nga motambong niining maong kalihokan si PSA-7 Regional Director Ariel E. Florendo.

Nag-awhag usab si higalang Noel Rafols sa publiko nga kanunay gyud nga makigtambayayong kon ang ilang ahensiya adunay pagahimoon nga pagkuha og statistics kay anhi man dinhi ibase ang mga paghimo og kalamboan sa nasud.