EDITORYAL - Transport strike napud

Lapad nga transport strike ang ilusad karong adlawa sa mga nagkadaiyang transport groups sa nasud aron babagan ang transport modernization program sa gobiyerno nga alang kanila jeepney phaseout ug karon giapil sab ang mga UV Express service vehicles sa sunod tuig. Pila na ka mga presidente ang nangagi ug kanunay nilang gihisgotan ang transport modernization, karon hinayhinay na kining natinuod pinaagi sa pagabot niining mga bag-o ug modernong mga pasaheroan.

Ang Stop and Go Coalition,  Pinagkaisang Samahan ng mga Tsuper at Operators Nationwide (PISTON) ug Alliance of Concerned Transport Organization didto sa kaulohan duyogan sa ilang mga lokal nga mga miyembro sa mga probinsya sama dinhi sa Sugbo.

Kinahanglan na gyud ang modernisasyon sa transport sector, kay gawas nga itom na kaayo og aso ang mga makina sa mga kagang-kagang nga pasaheroang lapas na og kinse ka tuig nagdagan ug nagdala na og polusyon, peligro na kaayo kini para sa mga pasahero ug mismo sa mga drayber. Dinhi sa Sugbo duna nay mga namasaherong mga bus ug kining mga eco-friendly e-jeeps, mga coasters nga nagbiyahi sa mga rotang dili sagad agian sa mga tradisyonal nga jeep pasaheroan.

Mas nindot ug hamugaway sakyan kay airconditioned ug limpyo, pasaheroang layo ra kaayo sa mga kagangkagang nga jeepneys. Mas mahal tuod og gamay ang plite, apan ang mga pasahero dili naman manumbaling basta relax lang ilang pagsakay. Sa mga drayber ug operator og pasaheroang jeep, lisud kaayo kanila kung wa silay ikapalit og bag-ong sakyanan, apan kun tabangan sila sa gobiyerno pinaagi sa paborableng kondisyon makapadayon sila sa ilang panginabuhian ug dili na sila kontribyutor sa polusyon. Ang kabalaka sa transport sector may kamatuoran, ilabi na bahin sa mga UV Express vans. Kay kung buot tan-awon ang maong mga vans bag-o  pa apan niabot na og 13 ka tuig nga maoy tagal kanila nga mamasahero. Dako og papel ang mga vans for hire pangdugang sa kakuwangon sa mass transport sa nasud. Sama nalang Dakbayan sa Lapu-Lapu diin liboan ka mga pasaherong gikan nagtrabaho didto ang gabii na kaayong makauli ug ang V-hires maoy ilang madali nga sakyan.

Sama sa PUJs, angay sab tabangan ang V-hires kung ang problema polusyon lang.

  Way dautan sa tumong sa gobiyerno nga modernisasyon apan kun wa pa gani silay mga imprastraktura para maserbisyohan ang tanang mga sumasakay, maayo tingaling hunahunaon una nila og balik ang ilang plano. Dinhi sa Sugbo, dili na kaayo makaparalisar kining mga ingon niini nga transport strikes tungod sa kadaghan sa sakyanan sa gobiyernong mohakot sa mga matanggong nga mga pasahero. Kun dunay magutman sa maong protesta, walay lain kondili ang transport sector gihapon.