Maanad ra sa disiplina

Kon nahimo ni Mayor Isko Moreno sa Manila ang paghawan sa mga nakaali sa karsada o agianan, walay rason nga dili kini mahimo sa tanang lokal nga kagamhanan.

Base sa kamandoan sa presidente ug gipaagi sa Department of Interior and Local Government (DILG) ngadto sa mga local chief executives nga kinahanglan limpyo na ang aginanan gikan sa mga obstruction.

Gipatuman sa mga dakbayan ang naasoyng lakang, gani sa dakbayan sa Sugbo subsob ang gihimong clearing operation sa mga sakop sa PROBE.

Ma-clear man nianang higayonan apan ang PROBE man lang pud ang atangan nga mohawa ug mobalik ra usab sila sa ilang naandan mga pwesto.

Makasabot man pud kita sa sentimiento sa mga street vendors nga gikinahanglan nilang manginabuhi aron duna silay ikabuhi sa ilang pamilya.

Kon wala silay kita nganga silang tanan kay wala may ikapalit og pagkaon, dili makapaeskwela sa mga anak. Moabot sa 400 ngadto sa 700 ka mga street vendors ang apektado niini.

Niduol na sila sa mayor kinsa andam gyud unta nga mosabot kanila apan nagapos ang kamot sa mayor tungod kay gikinahanglan man niyang tumanon ang mando sa Malacañang.

Kon mapakyas sila aw kahibalo na sila sa mamahimong kapalaran nila tungod kay seguradong makahiaguman gyud sila og silot.

Sa pag-implementar sa ingon niini nga palisiya wala nay kapilian ang mga pangulo sa LGU kondili ang pagsunod sa kamandoan nga alang sa kaayohan sa kinabag-an.

Sa Cebu City anaa og tagana sa kanunay pagsunod sa mando si Raquel Arce pangulo sa PROBE sa pag-clear sa mga nakaali sa kadalanan.

Wala ni siyay kukahadlok sa pagpatuman kon unsay nalatid sa lagda.

Gikinahanglan ang hugot nga bakos nga political well nga masustinihan ang palisiya nga ipatuman bisan og makamugna kini og negatibong epekto sa iyang imahe.

Sa sinugdanan ra seguro maglisod pagdawat ang mga apektado sa kabag-ohan apan sa kadugayan maanad ra man sa pagsunod sa lagda sa pangagamhanam.

Lisod kaayo kon ang gobierno na ang kontrahon kay segurado gyud sa kangkokan ka puniton.

Ang lakang sa kagamhanan usa ka matang sa pagdisiplina sa mga tawo nga sa sinugdanan dili makadawat tungod sa daghang mga paluoyluoy nga rason apan kon wala na gyuy kapilian, aw maanad ra seguro sa kadugayan.