EDITORYAL - Imbentaryo sa mga ebidensya

Ang kampanya batok sa ilegal nga drugas makadaghan ng gipasabot nga dili lamang kini buluhaton sa law enforcement units nga manakop kondili sa tanang hut-ong ug mga ahensya gobiyerno aron mamahimong epektibo.

Nakapaalarma karon sa mga lokal nga opisyales sa gobiyerno ang mga balitang may mga polis nga manguha og ebidensya aron i-recycle o ibaligya napud. Ang tawag kanila mga ninja cops. Maayo nalang nga dinhi sa Sugbo dili sama ka organisado ang mga ninja cops sa kaulohan nga usa gyud sila ka dakong sindikato.

Dinhi ang ninja cop giingong solo-tira lang, wa silay kauban pagkuha og mga ebidensyang ilegal nga drugas aron ibaligya og balik. Lisud ni silang monitoron kay pasekreto ra mang molabok.

May panawagan ang Cebu City Council sa  Philippine Drug Enforcement Agency dinhi sa Central Visayas ug Police Regional Office-7 paghimo og imbentaryo sa mga ebidensyang illegal drugs nga nakompiskar sud sa nakalabay nga lima ka tuig.

Asa man diay taguan kining mga masakmit nga ilegal nga drugas, makapangutana gyud ang publiko kay sa pagkakaron mura man og walay paghubas ang mga ilegal nga drugas nga masakmit sa mga police operations. Ang kapolisan adunay evidence room diin taguon ang mga nasakmit nga ilegal nga drugas. Matag hearing, adto kuhaon kaniya ang ebidensyang ipresentar sa korte. Apan ini og kahuman sa paghusay sa kaso wala na kaayo igdungog kun asa pangdad-a kining mga ebidensya.

Matag adlaw adunay masakmit nga ilegal nga drugas, busa dili na tingali ikahibulong kung mapuno kining mga evidence rooms, apan napuno ba gyud? Dili ba sampol ra man ang dad-on aron ipresentar sa korte kauban ang mga hulagway ug ubang suportang dokumento? Asa man diay gidala ang uban?

Subay sa nalatid sa Republic Act 9165 kinahanglan idispatsar kini human sa 72 ka oras human makapagawas og mando gikan sa korte. Tinuod ang pamahayag ni Councilor Antonio Cuenco nga kinahanglang sundon ang probisyon sa maong balaod aron nga dili kini ma-recycle o i-planted sa mga badlungong polis.

Maayo kining gihimo sa konsehal nga pagtawag sa atensyon sa mga law enforcement units aron masayod sila nga nag-monitor kanila ang mga lokal nga opisyales.