EDITORYAL - Hoy tawo, unsa may imong gihimo?
![EDITORYAL - Hoy tawo, unsa may imong gihimo?](https://media.philstar.com/photos/2019/09/24/banatoon_2019-09-24_21-47-52.jpg)
Duna ba gyuy kongkretong mga lakang ang mga gobiyerno, ang mga lider sa tibuok kalibotan mapugngan ang padayong paggrabe sa epekto sa Climate Change?
Pulos raman patapsing-tapsing kining tanang mga programang pang-kalikopan nga gipasiugdahan sa mga nagkadaiyang local government units, mga kompanya ug mga organisasyon. Daghan kaayong mga tree planting, coastal ug river cleanup drives, duna pay Earth Hour, ug daghan pang ubang mga adbokasiya para kunohay sa kalikopan, apan mura lang og duwaduwa sa uban.
Sama pananglitan, unsa may pulos aning pipila lang ka oras nga coastal o river cleanup drives o kaning Earth Hour (usa lang ka oras nga pagpawong sa kuryente matag tuig) nga kada segundos nagbugwak man og itom nga aso, naglabay og basura ang mga tawo ug giupawan ang kalasangan? Patas ba kini? O paggara-gara lang sa mga nagpasiugda aron kunohay makapangangkon silang duna silay gibuhat para sa kalikopan?
Pakyas ang United Nations Environmental Programs sa ilang paninguhang mapugngan kining krisis kay wala man kini seryusoha sa mga lider sa mga kanasuran.
Kung duna may gihimo, dili kinasing-kasing kay wala sa ilang plano nga palungtaron ang programa tungod sa personal nga interes ug politika.
Giingon nga ang tanang butang sa kalibotan natural nga konektado ug may kaugalingong sistemang gisunod. Pinaagi sa sistemang ang kalikopan ray nasayod, balanse kini sud na sa milyon-milyong katuigan.
Apan sa dihang nadiskubrehan sa tawo ang lana ug elektrisidad, giguba niini ang maong sistema ug karon di na maapupa sa kalibotan ang pagbalanse sa iyang kaugalingon, bisan na ang pagtambal sa kadaot mugna sa tawo. Posibleng kining climate change, paninguha kini ang kalibotan nga i-adjust ang sistema aron mohaom alang sa tanan apan ang tawo dili moduyog tungod sa iyang kahakog.
Kining nasinating global warming sa mga tawong buhi karon bunga pa kini sa pagpasagad sa ilang mga apohan kaniadto. Ug kun magpasagad sab kining henerasyona, mas grabe pang katalagman ang matagamtaman sa ilang umaabot nga mga apo.
- Latest