EDITORYAL - Di angay basulon ang uban

Dunay mga nasud nga nibotar pabor sa United Nations Human Rights Council (UNHRC) resolution aron maghimo og imbestigasyon bahin sa mga human rights violations dinhi sa Pilipinas.

Kahinumdoman nga ang nasud sa Iceland niadtong Hulyo 4 niduso og resolusyon ngadto sa UNHRC aron himoan og imbestigasyon kining mga giingong human rights violations nga gipasangil nga binuhatan sa mga ahente sa gobiyerno ubos sa pamunoan ni Duterte.

Kung limpyo ug nagtuo si Duterte nga walay nahitabong human rights violations sa iyang administrasyon, di siya angay mo-react og ingon niini batok sa maong mga nasud.

Igo ra kining mga nasura nisunod sa kung unsa sa ilang tan-aw ang husto subay sa UNHRC.

Sa 47-member UNHRC, ang 18 niini ang mibotar pabor sa resolusyon, kini mao ang mga nasud sa Argentina, Australia, Austria, Bahamas, Bulgaria, Croatia, Czech Republic, Denmark, Fiji, Iceland, Italy, Mexico, Peru, Slovakia, Spain, Ukraine, United Kingdom of Great Britain and Northern Ireland, ug Uruguay.

Ang mga nasud sa UK, Spain, Italy, Australia ug Austria ingon man Croatia dunay maayong trade agreements tali sa Pilipinas nga nakahatag sab og dugang trabaho dinhi sa nasud.

Ang uban niining mga nasura, tigpautang og pundo sa gobiyerno alang sa mga proyekto niini apil na sa administrasyong Duterte karon sa ambisyoso niyang ‘build, build, build’ program.

Kun tinuod nga may kamandoang sama niini si Duterte maapektahan gyud ug malangay ang katumanan sa iyang mga gipangsaad nga mga imprastraktura.

Gawas sa mga imprastraktura, ang modernisasyon sa Armed Forces of the Philippines gipaagi sab sa mga loan grants gikan aning mga nasura.

Apan kun tinuod nga gustong kanselahon ni Duterte ang mga loan agreements ug uban pang transaksyon sa Pilipinas gikan niining 18 ka mga nasud nga mipabor sa resolusyon, asa nalang kaha mokuha og pundo?

Sa China? Ang China nga dagko kaayo og interes ug may mga kolateral gipangayo samtang padayong nangilog sa mga teritoryo sa Pilipinas diha sa West Philippine Sea?