Tanom dinhi

Kini ang hinungdan kun nganong di kaayo ko molakaw og Lunes kay mahiligon man sa tanom mao nga nangolekta nako og sugod sa mga kahoy ug uban pang seedlings.

Akong himoon kahang lasang ang tugkaran ni San Jose? Ang tubag mao nga nindot kining himoong paraiso pinaagi sa mga natural nga mga adorno.

Gawas nga mga natural nga mga adorno nahimo pud silang kabahin sa kinabuhing maugmaron.

Matud pa nga usa sa mga benepisyo sa pagtanum mao nga matangtang ang imong stress ug anaa ang sense of excitement labina kun directly involved ka sa maong proseso.

Nindot kaayo tan-awon nga ikaw mismo apil sa maong proseso. Dugang pa makatabang ka pa sa kinaiyahan kun ugaling imo kining mahimo.

Ginaingon pa nga ang maayong panahon sa pagtanom og kahoy mga kawhaan kun biyente ka tuig nang milabay ug ang sunod nga panahon karong mga panahona.

Kay gawas nga maghatag kini og kaanindot sa atong palibot makatabang pud kini sa atong kalikupan.

Sama kita sa mga tanom nga nagkinahanglan og pag-amuma gikan sa Dios.

Mitubo kita ug kun dunay mga sanga nga nia kanato nga nahimong makadaut sa tibuok punoan angayan lamang nga kini pul-ongan.

Kubkoban ang atong palibot ingon man ang atong kaugalingong kinabuhi aron kini mamahimong himsog.

Ang grasya sa Dios maoy mobisibis aron magpabiling himsog ug lunsay ang atong kalagnon ug lawasnong kinabuhi.

Sayo sa kabuntagon ako nibangon og akong gisuhid ang akong palibot ug didto akong nakita nga  Maayo gyud ang Dios kay bisan pa man kun daghang daut sa akong kinabuhi padayon niyang gipul-ong ang mga sanga nga nia nako sa pamasin nga duna siyay makitang maayong bunga.

Kun ingon ini kamapailubon ang Ginoo, kita pa kahang mga tawo?

Si Paulino nangutana kun asa man itisok ang gipangibot nga dakit ako siyang giingnan nga adto kini sa walay wire sa kuryente ug dayag nga maigo sa init ni haring adlaw.

Kay mag-unsa man tuod ang kaanindot sa gitawag natong tanom apan atong gibonsai ug gipugngan ang iyang pagtubo?

Dili ba anugon man ang tanan niini? Apan kabahin sa arte ang pagbonsai ug ako anugon lamang ang way kahigayonan nga makakat-on niini.

Apan bisan pa niini nalipay lang pud ko nga mahiligon ko sa mga tanom kay akong nakita nga ning paagiha akong magamit por lo menos ang akong pagkamamugnaon.