Sa ngalan sa Amahan

Septiyembre 15, 2019: Ikakawhaag-Upat nga Domingo sulod sa tuig

Mga Pagbasa: Ex. 32;7-11,13-14/

Sal. 51/1 Tim. 1;12-17/Lk. 15;1-32

Patriarchal ang katilingban ni Jesus kaniadto gikan sa pulong Patros nga nagpasabot og amahan. Nga sa ato pa diay, nakasentro sa kinabuhi sa amahan ang maong katilingban ug sa nagkadaiyang aspeto niini mapamilya man o patigayon.

Mao nga kun unsay panginabuhi sa amahan mao usab ang mamahimong panginabuhi sa mga anak lalaki kay niadtong panahona, way labot sa kwenta ang mga anak babaye. Kun ang amahan mananagat ang mga anak niya lalaki mamahimong mga mananagat usab.

Ang amahan mao ang simbolo sa ekonomikanhong seguridad ug kun ang bisan kinsa nga mosukol sa amahan ang mamahimong alaut gyud sa kaulahian.

Dugang pa, ang katigayonan sa amahan mahimong bahinon lamang kun siya patay na ug ang maguwang anak lalaki ang dunay dakong katungod sa pahat dili ang manghud.

Sa dihang ang manghud ning atong ebanghelyo karon nangayo sa iyang bahin sama ra nga nitunglo sa iyang amahan. Gani, ang pinakasakit nga insulto mao nga nibiya pa gyud siya gikan sa maong dapit ug nilangyaw, usa man ka dakong pagpanamastamas sa dungog sa iyang banay. Angay lamang gyud unta nga siya patyon segun sa mandato sa ilang kultura.

Ang amahan sensitibo mao nga sa dihang nakita niya ang iyang masupilong anak nga nibalik iya siyang gisugat ug gisul-oban sa pinakanindot nga bisti, gisapatosan ug gisul-oban sa singsing. Naghikay pa gani siya aron sa ingon masayran sa tibuok katilingban nga dunay pakighiuli nga nahitabo tali kaniya ug sa iyang anak nga tungod niini walay si bisan kinsa nga makaako og pagpasakit kaniya. Kining tanan nahimong malisud dawaton sa maguwang nga nakasaksi sa maong panghitabo. Ang amahan padayong nialam alam kaniya aron lamang mapahari ang kalinaw ug kapasayloan sa ilang panilya.

Kun atong tan-awon ang atong kaugalingon, atong makita nga mahimong giabusohan nato ang kaayong Diosnon. Apan bisan pa niini, padayon siyang nihatag kanato sa pasaylo ug pagsabot. Apan wala kini magpasabot nga magsalig lang kita kay ang Dios maayo ug maloloy-on.

Angayan lamang nga maningkamot kita nga di mamahimong usik ang matag takna. Kay basin baya kun magkataas man tuod ang atong kinabuhi anha pa nato masuta nga daghang mga butang way hinungdan ang nahimong atong adlaw-adlaw nga binuhatan. Mao nga samtang buhi pa kita atong ipaambit ang pasaylo nga ato pud nadawat gikan sa Dios nga atong amahan.