Ugma na gyud

Dugaydugay ang atong paghuwat kanus-a manghatag sa financial assistance alang kanatong mga senior citizens. Nga gumikan sa pagkalangay, daghan kaayong mga speculations ug mga disinformation ang nabutyag, foremost niini mao nga nakanselar na kuno ang maong cash aid.

Of course dili kini mahitabo tungod kay usa na kini ka ordinansa, ug magkinahanglan og laing ordinansa nga mag-repeal niini. Busa, klaro nga panglawgaw ang maong kasayoran.

Unya, adunay nasibya nga naghatag og nagkalainlaing petsa ug adlaw nga maoy ipanghatag sa financial assistance. Medyo paglipatlipat ang katuyoan sa nagpasibya.

Laing disinformation ang nibutho nga kono gikinahanglan ang pink slip aron makakobra sa cash assistance. Dili kini tinuod, ug gipanghimakak kini ni Jeffrey Ocampo, ang Chief Executive Officer (CEO) sa Office of Senior Citizens Affairs (OSCA) ning dakbayan.

Bali’g tulo ka bulan ang atong makobra ugma, sa ato pa, P3,000 ang atong madawat. At last, kahupayan ang mga kabalaka sa dugaydugay nga paghuwat.

Nasayran usab nga ilakip na kadtong mga narehistro sa mga tuig 2011, 2012, ug 2013.

Apan, gumikan sa kahagip-ot sa panahon pag-encode sa mga bag-ong registrants ug pag-prepare sa payroll, lagmit dili makakobra ang tanan ugma. Apan, sa sunod na nga pagpanghatag nga maka-avail sila sa financial assistance.

* * *

Magsaulog na usab kita sa Senior Citizens Month sunod buwan. Sa kaulohan ug ubang mga dapit sa nasud, Senior Citizens Week ra ang ilang pagsaulog. Apan dinhi sa ato, Senior Citizens Month gyud. Usa ka buwan nga pagsaulog, apan dili matag adlaw ang kalihokan.

At any rate, gipangandaman na kini nila ni Jeffrey ug mga kauban sa OSCA aron magmalampuson ang kasaulogan.

Ug sama sa nangaging kasaulogan, ang Santos nga Misa maoy unang kalihokan sa unang adlaw sa Oktubre ... diha gihapon sa Plaza Sugbu. Giplano pa unsay mga kalihokan tapus sa Misa.

Matag Sabado ang mga kalihokan, sama sa medical/dental mission, libreng medical consultation, pasundayag sa Senior Citizens Gut Talent, zumba ug wellness program, ubp. Gipasalig nga magmabungahon ug makalingaw ang kasaulogan. Ato ning huwaton.

* * *

Mahitungod diay sa pagpili sa OSCA Head, giingon nga una sa tanan, ang mga barangay chapter associations mopili og delegado nga maoy mo-nominate ug mobotar sa buot mag-OSCA Head. Matud ni Jeffrey usa ra ka delegado matag barangay.

Sa ato pa, 80 ra ka delegado. Dili sama sa una nga kapin sa 100 ang mga delegado tungod kay adunay mga barangay nga adunay duha, tulo, o upat ka senior citizen associations.

Ambut ngano nga lisud mang usahon kitang mga Pinoy. Tungod ba kaha kay ang tanan gustong mag-presidente? O tungod ba kaha nga sa atong pagka-bright dili kita makadawat nga adunay mas bright kay kanato?

Sa America pananglitan, nagkompetensiya ang nagkalainlaing association sa mga Pinoy tungod kay di gyud sila magkasinabot didto.

So bisa’g asa kitang mga Pinoy, di gyud ta mahiusa. Sa mga barangay, diin kaila ang tanan, higala ang tanan, ug bisan sa kasilinganan, di gyud ta magkasabot.

Adunay mga laraw paghiusa sa mga senior citizen sa dakbayan, isip usa ka non-government organization, non-profit ug non-partisan.

Imposible ba ni? O magpabilin lang gyud tang nag-iyahay ug nagkatibulaag nga senior citizens?