Pagkaon ipanghatag

Nindot baya ang tumong ni Cebu City Konsehal Alvin Dizon nga ipahatag na lang ngadto sa mga tawo nga gipanggutom ang subra nga mga pagkaon nga wala mahalin diha sa mga kan-anan.

Apan sigurado ko nga kon maaprobahan man kining mao niya nga ordinansahon, tangdo-tangdoon lang siya sa mga tag-iya og restaurant kay panguwarta ra ang naa sa ulo sa mga tag-iya og kan-anan.

Kon wala mo masayod, tug-anan ko kamo nga gibaligya sa mga tagdumala og kan-anan ang subra nila nga pagkaon. Ang tigpalitan niini mao ang mga nagbuhi og mga baboy. Dili ba gud tinuod?

Aw, tingali kon manghatag man ang mga tag-iya og kan-anan, basin og ang mga subra-subra lang sa mga gipangkaon sa ilang kustomer. Si Konsehal Dizon nakamatikud nga dunay mga pagkaon nga gilabay lang sa mga basurahan, ug gianognan siya niini.

Nakabantay si Konsehal Dizon nga duna ubang mga tawo nga mangaykay sa mga basura gikan sa mga kan-anan aron panguhaon ang subra nga mga pagkaon nga ila pa’ng kapahimuslan.

Buyno, mosuporta ko nga kining maong ordinansahon ni Konsehal Dizon maaprobahan diha sa City Council ug mahimong usa ka balaod nga ipatuman dinhi sa siyudad.    

* * *

Naninguha gyud si kanhi mayor Tomas Osmeña nga dili magamit ni Mayor Edgardo Labella ang halin sa 45 ektaryang kayutaan sa South Road Properties (SRP) nga nabaligya atol sa termino ni kanhi mayor Mike Rama.

Matud ni Osmeña nga alkanse gyud ang siyudad kay barato ra kaayo ang pagbaligya ni Rama kaniadto sa kantidad lang nga tag P38 mil ang kada metro kwadrado.

Apan unsaon, sa tulo ka tuig nga termino ni Osmeña pagkamayor gikan sa 2016 hangtud sa 2019, wala gyud siya makabaligya og yuta sa SRP nga matud pa niya mahalin na og P115 mil ang metro kwadrado.

Diha man tuo’y Federal Land nga mitanyag nga mopalit sa tulo ka ektarya nga yuta, apan mora lang to og pasiatab kay napupos na lang ang termino ni Osmeña wala man gyud.

Kon nakapahalin pa si Osmeña og yuta sa SRP nga dako kaayo ang kantidad, tingali makatuo gyud ang katawhan nga dili maayo ang gihimo ni Rama kaniadto.

Apan wala gyud makabaligya si Osmeña bisan og usa ka metro kuwadrado.

Hinuon, sa pagbiya niya sa City Hall nagbilin siya og handomanan sa katawhan nga gipaguba niya ang iyang opisina.

Para nako, dakong sayop ang iyang gihimo. Maayo unta nga tambagan si Osmeña, apan kinsa man kaha ko nga iyang paminawon nga dili na man gani siya motubag ug mo-reply sa mga text message kon pangutan-on.