Armas nga lisensyado

Tan-awa, maayo gyud lagi nga may armas kay imo kining magamit kon adunay moatake ug magtinguha pagpatay nimo.

Kun wala pay armas si Atty. Inocencio Dela Cerna dihang gipusil siya kagahapon sa buntag duol sa Palace of Justice building sa North Reclamation Area, gitiwasan na tingali siya sa mga gunmen.

Maayo gani kay bisan og nasamdan na si Atty. Dela Cerna sa iyang bukton, nakamaneho pa siya paggamit sa iyang lisensyadong armas ug iyang gibawsan pagpusil ang mga kriminal.

Tuod, naglumba ang mga riding-in-tandem sa pagpadagan sa ilang mga motorsiklo palayo sa maong dapit. Mao na nga kamong mga supak gyud nga magtinil og armas, dili gyud tukma ang inyong argumento.

Ang ilang rason nga dili kuno maayong magtinil og armas kay basin og dali ra kaayong moinit ang ulo, ug bisan gamay’ng lalis, mogamit dayon og armas aron pusilon ang iyang gikalalis.

Ang ilang angay’ng sultihan niana mao ang mga wala mag-agi og training, kay ang mga licensed firearm holders nasayod kon kanus-a nila gamiton ang ilang mga pusil.

Abi ninyo, sa dili pa isyuhan og lisensya (License To Own and Possess Firearms) ang usa ka tawo, dayon irehistro ang iyang pusil, pakuhaon pa gyud siya og Permit To Carry Firearms Outside of Residence (PTCFOR).

Labaw sa tanan, ipa-undergo pa gyud kini og Neuro Test aron masuta kon init ba kini og ulo.

* * * 

Kaniadtong Sabado pa ko nag-ingon nga ang temporaryong plaka sa mga sakyanan, kinahanglan nga ang Motor Vehicle File Numbers sa inyong rehistro maoy gamiton.

May taxi driver sa LONA Taxi nga nadakpan kay ang iyang gimaneho nga sakyanan, ang plaka nga gikabit mao ang “073204” ug dili ang Motor Vehicle File numbers.

Unya, ang tag-iya sa LONA Taxi dili ra ba kuno maoy mobayad sa multa. Naunsa gud tawon ang tag-iya niining taksiha nga dili man maoy mobayad nga imo man na nga sayop!

Kadako ra ba sa multa nga P5,000 sa ‘use of improper plates.’ Pabayron nimo ang imong driver kun iyang sala, apan sala ba diay niya nga kamo man ang nagbutang nianang plaka nga matud sa LTO dili mao?

Kun pabayron nimo ang imong driver, ireklamo ka namo sa Land Transportation Franchising and Regulatory Board (LTFRB) kay ang pabayran nimo sa driver dili iyang sala.

Hunahunaa pag-ayo ang imong gihimo ug ayaw abusohi ang imong pobreng driver. Kining maong isyu gipadangat na nako sa LTO ug isunod nako pagpadangat sa LTFRB.