EDITORYAL - Maniobra sa RA 10592

Nabutang karon sa dili komportableng posisyon ang kontrobersiyal nga Republic Act No. 10592, o ang good conduct time allowance (GCTA) law nga maoy hinungdan sa pagpagawas sa dul-an dos mil ka mga kombiktadong kriminal nga nalambigit sa linoog nga mga krimen. Ang Malacañang miklaro nga walay apil sa RA  10592 ang mga kombiktado sa mga linoog nga krimen.

Busa makapaduda gyud kun giunsa man pagkahitabo nga nakagawas ang maong mga priso nga wala man silay labot sa maong balaod.

Maayo ang katuoyan sa RA 10592 kay para kini niadtong mga bilanggo nga tinud-anay nga nagbasol sa ilang nahimong salaod ug gusto nang magbag-o ug tarungon ilang kinabuhi.

Apan dili tanang mga nagbinuotan sa prisohan ang madawat sa katawhan nga pagawson ug makighugoyhugoy og balik sa katilingban.

Sumala pa sa report, sukad tuig 2014 ang New Bilibid Prison sa Muntinlupa City gibuhian ang dul-an ang dos mil ka mga kombiktado sa mga linoog nga krimen tungod kay napamub-an ang ilang sentensya tungod sa ilang pagbinuotan samtang sila gipriso.

Nabaniog kining kontrobersiya human nigawas sa mga balita nga si kanhi Calauan mayor Antonio Sanchez, ang suspek sa pagpatay sa manag-uyab ug paglugos sa babayeng tinun-an, gusto sab makagawas sa prisohan pinaagi sa maong balaod.

Tungod niini, gusto ni Pres. Duterte nga paesplikahon ang mga kadagkoan sa Bureau of Corrections nga maoy tigpirma sa release orders sa mga kombiktado ilabi na sa mga kontrobersyal nga mga convicts sama sa gibansagang Chiong Seven, ang responsible sa Chiong sisters rape-slay nga nahitabo sa Cebu niadtong 1997. Si Senador Panfilo Lacson maoy mibutyag nga nakagawas na ang mga kombiktado sa Chiong case apan dili ang director sa BuCor ang nipirma nga si Nicanor Faeldon. Kun tinuod niini, gustong masayod ang katawhan.