Sa ngalan sa delicadeza

Septiyembre 1, 2019: Ikakawhaag-Duha nga Domingo sulod sa tuig

Mga Pagbasa: Sir. 3;17-18-29/

Sal. 68/Heb. 12; 18-24/Lk. 14;1-14

Dili ikalimod nga karong mga panahona daghanan nato ang nahimong biktima sa NPD kun Narcissistic Personality Disorder. Sama sa mitolohiya nga si Narcissius imbis mahigugma sa uban ang nahigugma naman nuon sa iyang kaugalingon lamang nga tungod niini sige lang siya og sud-ong sa iyang kaugalingon ug nagpunay na lang siya og dayeg sa iyang kaugalingon.

Ang tanan nakasentro sa iyang kaugalingon. Mao ni ang hinungdan kun nganong daghang mga tawo ang buot mohigop sa tanang pasidungog ug gahum aron sa kaulahian mogawas silang mas gamhanan pa kay sa uban. Kini tungod kay kaha mao kini ang ilang dakong panginahanglan ang mamahimong hangdon sa kadaghanan.

Apan lahi ang panlantaw ni Jesus kun maghisgot kita og kabantog. Ang maong kabantog kinahanglang makasentro gyud unta sa mapaubsanong pagtahan sa kaugalingon aron makapangalagad sa uban.

Ang maong pagkamaalagaron nakasentro sa dakong tinguha nga himayaon ang Dios dili kay ituboy ang kaugalingon. Sa laktod dili nimo igsapayan kun ugaling nahimong dili makita o mapasidunggan ang imong gipakitang kakugi.  Dunay panultihon ang mga Heswita, Ad Majorem Dei Gloriam kun For the Greater Glory of God.

Mao nga sa dihang naglimpiyo ko sa bintana sa seminaryo kaniadto niduol ang among prefect of discipline dungan ang pag-ingon: “Akong tan-awon bi kun AD MAJOREM DEI GLORIAM ba ning imong pagpanglimpiyo dinhi ug tuod man Oops! daghang hugaw pa ang nitapot. Ang pari niingon kanako hala balika og limpiyo kun buot nimong himayaon ang Ginoo!”

Ang maong kasinatian nipahinumdom kanako nga bisan pa man diay sa diyotay nga mga butang mahimo diay gihapon natong mahimaya ang Dios diha sa paghimo niini uban  ang di kasarangang paghigugma ngadto kaniya.

Mao nga dili maayo ang magpagarpar panahon sa kalampusan kay ning paagiha mamahimong ang Ginoo mopanghimaraut kanato gumikan sa atong Delusion of Grandeur.