Milagro ni Faeldon

Usa sa nag-unang tumong sa kontrobersiyal nga Republic Act 10592 o ang mas nailang Good Conduct Time Allowance (GCTA) mao ang pagpaluag sa mga bilanggoan sa nasud.

Ang datus sa mga prisohan sa nasud nagpakita nga sagad niini kapin sa 100 porsiyento ang pagsugwak sa ilang capacity.

Ug usa sa mga solusyon sa mga magbabalaud niini mao ang pagpatuman sa GCTA diin ang pagbinuotan sa usa ka binilanggo bugtian og pag-iban sa mga adlaw sa iyang sentensiya.

Apan matud sa usa sa mga amahan sa maong balaud didto sa Kongreso nga si Cagayan de Oro City Rep. Rufus Rodriguez, walay labot sa makapahimulos niini ang mga nag-atubang og linuog nga krimen sama sa mga drug lord, rapist, ug uban pang konbiktado sa heinous crimes.

Si Rodriguez uban sa Sugboanong Kongresista nga si Eduardo Gullas, Aurora congressman ug karon Sen. Juan Edgardo Angara, Marlyn Aggabas sa Pangasinan, Victor Francisco Ortega sa La Union, ug Giorgidi Aggabao sa Isabela maoy sponsors niini didto sa ubos balay balauranan.

Matud ni Rodriguez nga ang ilang orihinal nga proposal mao nga iapil sa pag-ihap sa silot ang mga tuig nga giserbisyohan sa konbiktado didto sa bilangguan samtang nagpadayon pa ang kaso.

Ang mga senador kuno maoy gusto niining GCTA nga maoy mipatigbabaw ug nahimong balaud human gipirmahan ni kanhi presidente Benigno Aquino III niadtong May 29, 2013.

Didto sa Senado dunay walo ka version sa balaudnon nga giusa ubos sa pagpangamahan nilang kanhi senador Francis Escudero, Manuel Villar, ug Miriam Defensor Santiago.

Sila gisuportahan sab nilang Loren Legarda, Antonio Trillanes IV, Franklin Drilon, Ramon Revilla Jr., Sergio Osmeña III, Francis Pangilinan, Aquilino Pimentel III, Ferdinand Marcos Jr., Panfilo Lacson, Lito Lapid, Alan Peter Cayetano nga karon mao nay House Speaker , anhing Joker Arroyo, Jinggoy Estrada, Teofisto Guingona III, ug Senate President Vicente Sotto III.

Kun way labot sa beneficiaries sa GCTA ang mga konbiktado sa heinous crimes, nganong nakalusot ang upat ka mga drug lord nga insik ug ang mga konbiktado sa Chiong case?

Matud ni Lacson nakabuhi na ang upat ka mga drug lord ug ang uban sa mga nagdagit, naglugos, ug nagpatay sa managsuong Marijoy ug Jacqueline Chiong.

Dako og angayang ipasabot ang gobyerno niini. Dakong sagpa sa administrasyon ni Presidente Rodrigo Duterte nga taliwa sa iyang mga balikas ug bahad nga patyon ang mga durugista dunay upat ka konbiktadong drug lord nga gibuhian sa iyang gobyerno.

Wala pay labot niini ang binilyon nga shabu nga giingong gipalusot diha sa Bureau of Customs ubos sa pagdumala ni Nicanor Faeldon nga karon mao na say direktor sa Bureau of Correction.

Sulagma ba lang nga kon asa madistino si Faeldon dunay dakong milagro?