Ilisan na lang ang motto

Sa nahitabong trahedya diin usa ka barko ang nasunog samtang naglawig sa kadagatan sa Dapitan City, gisaway ang wala pagpatim-aw sa Coast Guard aron unta pagtabang sa mga pasahero bisan kon duol na unta ang barko sa Pulawan Port. Naluwas hinoon ang mga pasahero gumikan sa tabang sa ubang barko nga misanong sa distress call. “SAVING LIVES” man unta ang ‘motto’ sa Coast Guard, apan tungod sa gitumbok nga kapalpakan nila sa maong trahedya, maayo tingale nga ilisan na lang ang ilang motto ngadto na sa: “WATCHING LIVES SAVED”!

Na-postpone ang kamatayon

Gikataho nga dul-an sa 100 ka gatos ka mga baboy ang gipabalik sa ilang gigikanan nga lugar sa Masbate human mahibaw-an sa Provincial African Swine Fever Task Force nga gi-tamper ang permit sa pagbiyahe sa maong mga hayopan.  Walay gikataho nga pagreklamo o pagwelga ba kaha sa mga baboy kay alang kanila ang pagpabalik kanila sa Masbate nagkahulogan nga mahalikay sila sa pihong kamatayon diri unya sa ihawan sa Mandaue City.  Hala no!

Rason batok garbo

Human sa dul-an duha ka bulan nga panagbingkil, magamit na gayod ni Mayor Ahong Chan ang luna nga gigun-an kanhi ni Lapu-lapu Rep Paz Radaza gumikan sa paghabwa sa mga butang sa maong opisina tungod sa gipahigayon nga imbentaryo sa GSO. Niining usa ka yano lamang unta nga isyu, tungod sa politika, dili rason ang mipatigbabaw kon dili garbo. Katawhan ra usab ang maalkanse!

Hugot ug bakak bisan nasakpan

Gipanghimakak ni PhilHealth Chief Executive Officer Ricardo Morales nga adunay “mafia” diha sa maong ahensya nga gitumbok nga maoy hinungdan sa mga anomaliya sa maong buhaton.  Matud pa sa akong apohan, “Ang ubang tawo nga sad-an, daw sama sa langgam nga Uwak (crow), bisan nasakpan na nga maoy nagtangag sa kinuha, moingon pa jud nga: “Waa,Waa, Waa”! Limod pa more!