EDITORYAL - Maritime safety

Gawas sa mga dagkong natural nga mga kalamidad sama sa bagyo, linog ug uban pang katalagman, ang mga peacetime maritime tragedies ang hinungdan sa daghang kamatayon sa mga tawo pagkahuman sa ikaduhang kalibutannong gubat.

Ning bag-o, subo kaayo ang nahitabo sa usa ka barkong pasaheroan nga nasunog samtang naglawig gikan sa Samboan, Cebu padung sa Dapitan City didto sa Zamboanga del Sur sa Mindanao niadtong miaging gabii.

Ang maong aksidente mikalas og tulo ug swerteng kadaghanan sa mga pasahero nasalbar ug nakalikay gikan sa kamatayon.

Ang MV Lite Ferry 16 nagdala og     248  ka pasahero ug mga sakyanan sa dihang nahitabo ang 2sunog pipila nalang unta ka kilometro padung sa pantalan.

Ang Philippine Coast Guard naghimo na og imbestigasyon bahin sa maong insidente, apan subay sa mga unang nigawas nga mga balita giingong nagsugod ang sunog sa engine room niini.

May mga pasangil sab nga walay taga coastguard nga nakaresponde dayon sa distress call. Apan dunay fastcraft nga mipaduol sa nabaldang barko aron tabangan ang mga pasaherong nangambak na sa tubig.

Ang maong pasangil angay pang imbestigahon. Matud pa sa pamahayag sa Coast Guard, sila maoy nimando sa maong fastcraft nga duolon ang nasunog nga barko aron makatabang.

Husto ang gibuhat sa Coast Guard kay ang importante maluwas dayon ang mga pasahero ug tripulante.

Mao man kini ang mga obligasyon sa tanang mga barko, ang motabang dayon sa way pagduhaduha sa mga barkong naaberya diha sa lawod, mas pa kun masunog.

Ang Pilipinas usa ka archipelago nga gilangkoban og kapin siyete mil ka mga isla mao nga dako og papel ang mga ferry o barko kay mas barato og plete itandi sa eroplano.

Mas daghang madala ang mga pasahero sa ilang biyahe busa dili gyud kini mawagtang isip mode of transportation hangtud sa hangtud.

Ang importante nga seguraduhon kanunay mao ang maritime safety practices sa matag shipping companies ug sa samang higayon palambuon pa og maayo ang kagamitan sa Philippine Coast Guard aron mas mabuhat nila ang ilang tahas.