Dili “UNSA” kon di “KINSA”

Sumala sa listahan nga gisumite sa Department of Budget and Management ngadto sa Kongreso, aduna’y mokabat sa 200 mil ka bakanteng trabaho karong tuiga diha sa nagkalain-laing ahensya sa gobyerno. Karon nga nasayod na ang mga politiko nga daghan ang bakante, makalaom usab kita nga maglumba dayon sila’g duso sa ilang rekomendasyon alang sa ilang mga kaila ug paryente. Ang pagpanarbaho sa Pilipinas, dili gayod barahan kon “UNSA’Y imong nahibaw-an” kon dili “KINSA’Y imong nahibaw-an”.

Padayon ang “diskoral” ug “sing-al”

Mipalabang og resolusyon si Konsehal Dave Tumulak nga nagdili na sa paggamit sa mga kadalanan alang sa mga pribadong kalihokan sama sa disco, bilar sa patay ug uban pa’ng susama’ng kalihokan. Alang sa mga mahiligon sa disco, dili kini problema kay moadto man lang sila sa kasikbit nga dakbayan nga dili apektado sa maong resolusyon sama sa Mandaue ug Talisay. Alang sa mga mahiligon moawit, walay bikil ang maong resolusyon basta di lang i-apil sa pagdili ang videoke. Hala, “sing-al” ug “diskoral” pa more!

“Paleho la” way agas

Mipasidaan ang MCWD nga adunay adlaw diin makasinati ang ubang lugar sa dakbayan sa Sugbu ug Talisay nga walay tubig tungod sa ipahigayon nga pag-ayo sa mga guba nga mga tubo.  Apan alang sa katawhan, may ayohon man o wala ang MCWD, wala man gihapo’y agas sa tubig sa ilang lugar. Pulong pa sa intsik, “Paleho la”.

Wa na’y homework

Gikataho nga ang ubang mga opisyales sa DepEd uyon sa gipanday nga balaodnon nga nagdili na sa paghatag og homework sa mga kabataan. Daghan ang nakauyon sa maong gilaraw nga balaodnon.  Angayan lamang nga ang gimbuhaton sa eskuylahan pagabuhaton sa eskuylahan. Salikwaot nga tawgon ang gimbuhaton sa estudyante nga “homework” bisan sa tinuod kini usa gayod ka “schoolwork”.

Daghang kamot

Mipagawas si Mayor Edgar Labella og usa ka Executive Order nga nag-umol sa Cebu City Sinulog Governing Board kansang tumong mao ang pag-oversee sa mga kalihukan sa Sinulog 2020.  Mahinumduman nga ang Sinulog Foundation Inc. maoy nagdumala sa pagpahigayon sa Sinulog sa nanglabay’ng katuigan. Tinuod nga aduna’y panultihon nga “Daghang kamot makapaga-an sa trabaho”.  Apan adunay laing panultihon usab nga nag-ingon, “Daghang kusinero, makapalas-ay sa sabaw”. Mopatigbabaw lang unta ang nahaunang panultihon.