EDITORYAL - Kang kinsa mang kaakohan?

Husto ang bahad ni Cebu City Mayor Edgardo Labella batok sa mga barangay kapitan sa dakbayan nga sila pangkasohan ug manubag kun makitang nagpasad ang ilang mga basura sa kadalanan.

Nindot ang iyang planong (bisan wala kinahanglana) nga pahatagan og tag P5 milyones ang mga barangay nga makamentinar sa kalimpyo sa ilang dapit aron lang aduna silay magamit pagpamalit og garbage trucks ug sweldo para sa mga garbage loaders ug uban pa.

Ang mga barangay, adunay  loaders ug mga kaugalingong mga mini-garbage trucks paghakot sa mga basura diha sa mga sudlonong bahin sa ilang mga dapit.

Ang giabangang mga dagkong trak sa siyudad mao sab ang mohakot diha sa dagkong dalan sa mga barangay.

Apan dili tanang panahon modagan ang mga trak sa barangay tungod kay usahay mangaguba kini ug dugay mapaayo, o ba kaha walay drayber nga makadala tungod sa nagkadaiyang rason.

Sa laktod, pundo ang kuwang aron makasustinir ang pagpanghakot sa basura. Anhing dapita magamit ang tag P5 milyones nga ihatag.

Mas maayo tingaling iuna paghatag ang tag P5 milyones aron makapamalit nang daan og garbage trucks ug pangsweldo og mga garbage collectors ayha pa ipatuman ang higpit nga paghipos sa mga basura.

Pagkatinuod wala man pud gi-require ang siyudad nga mohatag kanila apan tungod kay sakop man nila ang mga barangay kinahanglan silang motabang.

Sa sinugdanan pa lang nasayod na ang mga barangay kapitan nga ilang kaakohan ang pagsigurong kanunay nga limpyo ang iyang barangay.

Bisan og dili pa sila hatagan og pundo para niini gikan sa siyudad ilang responsibilidad ang mangita og paagi aron dili maghugaw-hugaw ang mga residente pinaagi sa mga ordinansa ug pagduol sa mayor o ubang ahensya sa gobiyerno.

Lakip na niini ang mga pamaagi aron mahipos og tarong ang mga basura sa ilang dapit kay kun dili gani, sila ra man sab maoy mag-antos sa kabaho.