Bayranan sa mga bangko
Atubangan sa kontrobersiya sa paglibkas sa Bangko Sentral ng Pilipinas (BSP) sa unom ka tuig nga moratorium sa uminto sa bayranan sa mga transaksiyon sa automated teller machines (ATMs) sa mga bangko, nga gikabalak-an nga ma-doble ug mopasamot og pahiyos sa gamay nang daan nga suholan sa mga anak sa singot, nitumaw ang makiangayon nga sugyot:
Nganong di man suguon ang mga bangko, sama sa uban nga public utilities, sa pag-detalye sa tanan nilang bayranan, di lang sa ATM kon dili sa tanan gyong transaksiyon, nga ilang gipahamtang sa depositors?
* * *
Nabalaka ang kahugpongan sa pamuo nga malaslasan og hangtod sa 8% ang minimum nga suholan sa mga taga Sugbo ug ubang lalawigan kon patuyangan ang mga bangko.
Nahadlok ang mga kawani ug pensioners sa gobyerno nga silay magsagunto sa mas dagkong bayranan kay nihit ug sigeng offline ang ilang ATMs.
May mga namuyboy na gani nga mga bangko maoy utangan ug busa di angay nga mopahimus sa pagbunal og bisan unsa na lang nga bayranan sa depositors.
Ang BSP mismo nisugyot og luwas ug barato nga mga alternatibo sa ATMs.
* * *
Sa pikas nga bahin, nipasalig ang mga bangko nga wa silay plano sa pagpaburot pag-ayo sa ATM charges.
May pipila gani nila nga nipahibawo sa BSP sa ilang plano paglaslas sa ilang bayranan.
Sa samang higayon nipasabot ang mga bangko sa mga gasto sa pagbutang og ATMs, sama sa abang sa mga luna ug bayad sa teknolohiya ug mga kompaniya nga maoy aktuwal nga nagpalihok ug nag-atiman sa ilang ATMs.
* * *
Kun napugos sa gobiyerno ang power distributors ug mga kompaniya sa ayroplano sa pag-unbundle sa ilang bayranan, nganong di man ang mga bangko?
Kun pila may gasto sa operasyon sa ATMs mas gamay gyud tingali sa pag-suweldo og mga kawani og walo ka oras matag adlaw ug lima ka adlaw matag semana sa karaan nga over the counter transactions.
Hinaot nga di sundon sa mga bangko ang hakog nga oil companies.
Nga nikiha aron di mapugos pag-unbundle sa presyo sa ilang mga produkto.
Nga kadudahan kaayo nga, mous-os man o mosaka, magkinopyahay gyod sila hangtod sa kataposan nga usa ka dako.
* * *
- Latest
