Legal na bang video karera?
Nataligam-an sa lalis sa tambag ni Presidente Rodrigo Duterte sa mga polis sa pagdawat og mga gasa, nga iyang gipasalig nga di suburno nga maoy gidid-an sa balaod, mao ning laing bahin sa sama niyang pakigpung sa ika-118 nga anibersaryo sa Police Service sa Kampo Crame:
“Yung machine di ba ‘yung karera… inyo naman ‘yan. Wala man akong pakialam. Eh hindi mo rin naman talaga mapigilan.”
Mao tingali nga wa hisguti sa iyang mga tigpamaba. Kay maglisod sila pagpasabot sa pagdasig sa presidente sa mga polis pagpanguwarta sa ilegal nga sugal.
* * *
Lisod nang daan nga sabton nga samtang nangugat si Presidente Duterte sa iyang SONA sa niaging buwan sa hiningusgan nga kampanya batok sa pangurakot iya ra sab nga gigiyahan ang mga polis sa pagdawat og kuwarta basta gamay lang.
Mas lisod pa gyod nga ispilingon nga samtang gipahunong ang mga sugal sa Philippine Charity Sweepstakes Office (PCSO) nga gidudahang gigamit pagpalambo sa ilegal nga mga sugal iya ra sab nga gitugotan ang mga polis sa pagdugang sa ilang kita pinaagi sa pagdawat sa kuwarta gikan sa operators sa video karera machines.
* * *
Kinaham nga salida sa kapolisan pagpasalig nga wa sila magmika sa katungdanan mao ang pagguba sa gatosan ka video karera matag karon ug unya.
Apan nahibawo tang tanan nga mga kahang kahoy ray giguba kay gitangtang na man ang mas mahinungdanong central processing unit (CPU).
Magpadayon pa bang pagpaka aron ingnon sa mga polis?
O human sa tambag sa presidente di na sila maglipud-lipod sa sinemanang koleksiyon sa matag video karera sa ilang hurisdiksiyon?
* * *
Samtang nasentro pa ang lalis unsay kagamay ang gasa una matawag nga suburno wa magtagad pagpatin-aw ang Malakanyang kon unsay kalainan sa video karera gikan sa masiao sa Kabisay-an ug Mindanao ug jueteng sa Luzon ug ubang ilegal nga mga sugal.
Ma-usab-usab na ba diay ang mga balaod sa nasud agad lang sa sulti sa presidente?
Mo-atras-abante ba lang diay ang kampanya batok sa pangurakot, sama sa uban nga mga saad sa presidente, agad sa unsay iyang mahunahunaan, unsay kahimtang sa iyang kabuot, unsa ang labing uwahing balatian nga nitakboy niya ug kinsay kataposan nga nakahunghong niya?
* * *
- Latest
