Pagduwa-duwa sa balaod

Bisan may panagsumpaki ug gani may paghinangyo-ay pa tali sa mga senador sa adlaw ug tuig kon kanus-a gayod ipahigayon ang barangay ug SK elections, daw aduna na’y consensus nga kini i-uktaba gayod og dili ipahigayon sa tuig 2020. Makalipay kini nga balita ngadto sa mga opisyales sa barangay ug SK, lakip kadtong mga tapolan ug way hinungdan. Lain na usab kini nga matang sa pagduwa-duwa sa balaod sa atong mga Magbabalaod. Politika pa more!

Motidlom, motuyhakaw

Adunay laraw ang Cebu City government nga i-regulate na ang operasyon sa habal-habal gumikan sa nagka-grabe nga kahimtang sa trapiko. Maapektohan unya niini ang 3 mil ngadto sa 4 mil ka mga drivers, kansang gidaghanon mahimong makapadaog o makapapukan sa usa ka politiko. Ang maong laraw nahisama sa ba-o (turtle) nga anaa sulod sa lamawan: ang ulo motidlom ug motuyhakaw matag karon ug unya.  Pangutana: Motuyhakaw na ba gayod sa hingpit ang maong laraw o magpabilin lang gihapon kini ilawom sa lamaw sa paghiko-hiko?

Senate teleserye na pud

Naglaraw ang Senado nga maghimo og imbestigasyon sa Department of Education (DepEd) gumikan sa dili maayo nga ‘performance’ sa ahensya sa ilang mga mahinungdanon nga programa.  Makakita na usab unya ang katawhan og bag-ong salida diin ang mga Senador maningkamot pakigkompetensya sa mga naandan nga programa sa TV.  Atangi unya ang pag-ilogay sa rating tali sa programa nga “ANG SENADO” vs. “ANG PROBINSYANO”.  Hala no!

Solo-ha ang bakuna

Taliwala sa kahadlok sa mga ginikanan gumikan sa kontrobersya nga dala sa bakuna nga Dengvaxia, laraw gihapon sa DOH 7 nga molusad og halapad nga pagpamakuna sa mga Grade 1 ngadto sa Grade 7 nga mga kabataan.  Aron maaghat ang mga ginikanan nga mohatag sa ilang pagtugot nga mabakunahan ang ilang mga anak, himoong libre ang pagpamakuna. Ang tubag sa mga ginikanan nga wala pa mahuwasi sa kalisang sa Dengvaxia: “SOLO-HA na’ng inyong bakuna!”

Ma-alihan na hinoon

Gikataho nga mokabat sa 200 ka mga sakyanan nga nag-parking sa kadalanan ug sidewalk ang natanggong gumikan sa clamping operations nga gipahigayon sa CCTO.  Usa sa tumong sa taga-CCTO mao nga mawala ang mga babag sa kadalanan ug sidewalk gumikan sa ilegal nga parking.  Usa ra ang tow truck nga magamit sa CCTO. Kon dili dayon malukat ang natanggong nga sakyanan, dili kaha kini maka-ali na gayod hinoon sa agi-anan? Isip-isip!