Numero uno!

Gisaulog kagahapong adlawa ang ika 450 nga founding anniversary sa lalawigan sa Sugbo.

Ang pinasidunggang dinapit sa okasyon si Davao City Mayor Sarah Duterte kinsa nahingangha nga miabot na diay sa 450 ka tuig ang Sugbo, ang labing karaan nga probinsya sa nasod.

Matud sa mayor sa Davao nga manghud ra kaayo sa Sugbo ang ilang dapit kay 80 pa lang sila ka tuig.

Kung sa kasaysayan hilabihan na ka dato ang lalawigan nga manghud lang og 50 years sa pagkakaplag ni Ferdinand Magellan diin saulogon usab nato ang ika 500 years sa 2021.

Atol sa pamahayag ni Governor Gwen Garcia gihimug-atan niini ang pagbutang og balik sa lalawigan sa Sugbo isip numero uno sa tibook nasod.

Kini atol sa iyang pagpangatungdanan kaniadto isip gubernador diin matod niya nga natagak sa ika 45 nga dapit ang Sugbo atol sa kanhi namunoan nga iyang gisundan.

Ang pulong sa gubernador nga “number one” ang tinguha nga himoong sumbanan sa Davao City kay sukad masukad wala pa man sila nakasinati nga nag number one.

Matud ni Mayor Sarah nga himoon sa ilang syudad ang mga programa nga nasuwayan na kaniadto ug karon sa pagbalik ni Gov. Garcia sa probinsya.

Sa susamang higayon mapaambit usab sa Davao City ang mga sistemang gipatuman sa ilang dapit nga epektibo kaayo ilabi na sa pagpatuman sa kahapsay ug kalinaw.

Siyempre maangkon lang kini kon ipatigbabaw ang disiplina sa katawhan nga mosunod sa mga lagda nga ipatuman. Sa kalig-on sa duha ka mga babayeng lider dili kaduha duhaan nga makab-ot ang gitinguha nga mag number one.