EDITORYAL - Dengue ug ang Dengvaxia

Gihugonhugonan karon nga gusto sa Malacañang nga ipadayon ang kontrobersyal nga dengvaxia vaccine nunot niining kapin na sa 116 mil ka mga natalang kaso ug 491 ang namatay sud sa unom ka buwan karon lang tuiga.

Ang maong gidaghanon nidoble gikan 57 mil sa samang mga buwan o 86 porsiyento. Makaalarma kini tungod kay bisan sa gihimong kampanya sa Department of Health wala mokunhod ang gidaghanon sa mga nasakit niini particular sa Western Visayas nga nitala og 16 mil ang natakboyan.

Wa pay nakahatag og kongkretong rason kun nganong nidaghan og maayo ang mga natakboyan. Apan ang Palasyo gusto nga ipadayon ang pagpamakuna.

Kun buhaton kini ni Pres. Duterte, wala siya’y kalainan sa gisundan niyang pangulo nga si Benigno Simeon “Noynoy” Aquino III kinsa atol sa inquiry bahin sa kontrobersiya sa dengvaxia midepensa sa pag-ingon nga niuyon siya sa pagpagamit sa maong mga bakuna tungod sa nagkadaghang nangasakit og dengue.

Maayong tan-awon una kun ang pagsaka sa gidaghanon sa mga nasakit karong tuiga may kalambigitan ba sa dengvaxia.

Maayo susihon kun daghan ba sa mga natakboyan niini karong tuiga ang apil sa mga nabakunahan kaniadto sa dengvaxia sa wala pa kini ipahunong.

Kun pananglitan daghan gyud sa mga nataptan og dengue karong tuiga nabakunahan og kompletong dengvaxia vaccine, nan, dili na angay ipadayon pa ang maong bakuna.

Apan kun bisan usa wala, posibleng epektibo ang maong bakuna ug angay lang sigurong ipadayon ug ang korte nay bahalang modesisyon sa nagung-ong nga mga kaso batok sa mga opisyales sa DOH.

Dili gyud angay sagolan og pamolitika ang kahimtang sa panglawas tungod kay seryuso ang sakit nga dengue ug daghan na ang gipatay niini.

Kadtong mga nagpataka lang og buka ang baba bahin sa dengvaxia kun dili sila eksperto sa medisina, dili na unta magpagarpar tungod kay sa ilang gibuhat, posibleng sila maoy mamahimong hinungdan sa pagkamatay sa daghang kabataang Pilipino.