EDITORYAL - Mangitngit nga kagabhion

Ang pagkadiskubre sa sugang dagitabnon pinaagi sa elektrisidad nakapapaspas sa paglambo sa mga dapit dinhi sa kalibotan. Sa karaang panahon, ang mga tawo ini og sawop sa adlaw mamahuway nalang ug nahunong sa ilang ginbuhaton.

Apan dihang nadiskubrehan ang elektrisidad mas mitaas ang oras sa tawo nga makapanarbaho ug nakatampo kini og dako sa ekonomiya.

Dinhi sa Pilipinas kapin sa duha ka milyon pa ka mga pamilya o 13 milyones ka mga tawo ang literal nga wala gyud makatilaw og kahayag gikan sa sugang dagitabnon gikan sa kuryente. Sagad kanila mga nagpuyo sa mga hilit nga kabarangayan sa nasud. Sumala pa sa report sa The Philippine Star 19 mil ka barangay sa nasud ang wala pa gyud maabot sa serbisyo sa elektrisidad.

Sa pagkakaron, ang matag probinsya adunay mga electric cooperatives nga maoy nagpasuga sa mga kabalayan, apan bisan pa man sa ilang paninguha ug suporta gikan sa gobiyerno dili tanang mga dapit ang ilang napasug-an. Daghang rason kun nganong daghan pang mga dapit ang walay serbisyo sa elektrisidad, apan duha ang nag-unang hinungdan, ang kakuwang sa mga imprastraktura padung sa mga hilit nga barangay sama sa mga tarong nga kadalanan ug ang ikaduha mao ang kahapsay ug kalinaw sa dapit.

Pipila ka mga probinsya sa Mindanao ang wala pay serbisyo sa elektrisidad hangtud karon tungod dunay mga aktibong grupo sa mga rebelde ug mga terorista.

Usa niini ang Lanao del Sur, daghan pang mga lungsod didto ang walay elektrisidad kay ang mga poste sa kaniadto Lanao Sur Electric Cooperative (LASURECO) tuyong gipangguba o gisunog sa mga dautang elemento niadtong dekada 80. Lisud para sa mga electric cooperatives ang pagtaud og mga poste ug linya sa kuryente kun walay karsada ug kun may hulga sa seguridad.

Mao kini ang angay nga unahon sa gobiyerno aron maserbisyohan og elektrisidad kining 19 mil ka mga barangay sa nasud ug makatampo sab sila og dako sa ekonomiya sa nasud.