Hakot mentality

Dili ikalimod nga daghan nato karong mga panahona ang nahimong hoarders sa mga butang nga naghatag kanato og kalipay.

Apan ang nakadaut lang usahay kay kining maong mga butang nakahatag man kanato og lumay nga tungod niini bisan kun sayud kita nga dili makiangayon ang pagdala kanila nahimo kitang hakog ug ulipon sa ilang kasilaw.

Mao nga bisan sayud kita nga dunay daghang mga maayong grasya nga nagpaabot nato ato gihapong gidala dala ang maong mga kabtangan sa atong kagahapon. Mao nga lisud ug hinay alang nato ang pag move on sa atong kaugmaon.

Tinuod daghan ang nihatag kanako og mga butang dinhi sa Mohon. May TV, ref ug uban pang mga butang kinahanglanon apan nagdumili ako sa paghakot kanila sa sunod nakong adtoan. Travel light matud pa nila kay ning paagiha dili malisud alang nato ang pagpangita sa atong dapit diha sa kalibutan nga puno sa hakot mentality.

Gitawag kini og hoarding gani bisan wala na nato kinahanglana ato man gihapong dad-on kay lagi anugonan ta. Kun padayon nga kini ang kinaiya sa matag tawo mamahimong miserable tuod ang kinabuhi.

Padayon kitang mohakot at the expense sa nagsunod. Padayon kitang mohakot unya sa kaulahian atong naamgohan nga dili mahinungdanon atong nadala kondili mga basura nga giisip gihapon natong importante sa atong kinabuhi.

Ingon ini usab ang kasinatian kun maghisgot kita og hakot mentality. Dunay mga pagbati nga angayang ilubong sa kalimot labina kun sila traumatic alang kanato.

Dunay mga pagbati nga angayan natong bitbiton kini tungod kay naghatag sila og kaayohan alang kanatong tanan apan dunay mga pagbati nga kalimtan tungod kay naghatag sila nato og kaluya ug mahimong kanato makaboang.

Unta dili nato bawonon ang bisan unsang makadaut kanato kondili atong dad-on ang bisan unsa nga kanato makatabang ug makagiya sa dakong bili sa panaw sa kinabuhi nga way igong gidala gawas sa pagsalig sa kaugalingon ug ang dakong tinguha sa paghimo og maayo taliwala sa atong kadautan. Nahigmata ako sa dihang nangutana sila kun dad-on ba nako ang inidoro? igo lang ko  sa pag-ingon og SIMBAKO.