Lapulapu ug Pugapo

Kun mapasar sa Kongreso ug hingpit nga mahimong balaud ang House Bill 2223 nga giduso ni Congresswoman Paz Radaza, dili na mahimong tawgon nga “Lapulapu” ang isdang “pugapo.”

Alang ni Radaza nga maoy representante sa lone district sa Lapu-Lapu didto sa hawanan sa kongreso, dili makiangayon ug usa ka matang sa pagpasipala sa bantugang bayaning bisaya nga si Lapulapu ang paggamit sa iyang pangalan alang sa usa ka isda.

Mao nga buot ni Radaza nga hunongon na ang pagtawag sa isdang pugapo nga Lapulapu.

Ubos hinuon sa iyang balaudnon way gilatid nga silot sa mga masakpang molapas niini. Buot lang niini nga manduan ang mga ahensiya sa gobyerno sama sa Bureau of Fisheries and Aquatic Resources apil na ang mga information agencies sa gobiyerno nga edukahon ang publiko nga dili tawgong Lapulapu ang usa ka isda.

Nakasabot ko sa tumong ni Radaza, buot lang niyang mahatagan sa hustong pasidugong ang unang bayamomh Pinoy. Apan kadto lang mga tawo nga ang paminsar sama kadako sa utok sa isda ang maghuna-huna og sama niini.

Sa kadaghang problema nga giatubang sa iyang dakbayan kini ra gyud maoy niabot sa huna-huna ni Radaza?

Isip representante sa mga Oponganon didto sa Kongreso, gikonsulta ba niya ang katawhan unsay problema nila nga nagkinahanglan og pagtagad?

Masulbad ba sa nag-unang problema sa mga Oponganon kun ang isdang “pugapo” dili na tawgong Lapulapu?

Kini unta maoy unang pangutana nga angayang tubagon sa mga kongresista sa dili pa moduso og balaudnon. Unsay epekto ngadto sa publiko sa balaudnon nga ilang buot ipalabang.

Mao ni resulta sa mga politiko nga way hibangkaagan sa trabaho nga magpaluma-luma aron lang magpabilin sa gahom. Ambot unsay nawilihan!

Usa sa mga balaudnon nga maisip nga sumbanan kun ang hisgutan ang kamahinungdanon ug kamapuslanon mao ang giduso ni Deputy Speaker Pablo John Garcia nga magpapas sa height requirement sa mga buot moserbisyo isip “uniformed personnel.”

Mao ni balaudnon sa tinuod nga representante sa katawhan didto sa Kongreso dili kay problemahon ang pangalan sa isda. Kun mapalabang ang balaudnon ni Garcia kahatagan na unya og patas nga kahigayonan ang mga putot nga makasulod sa serbisyo pagkapolis, bombero, ug uban pa.

Sa nanglabay nga mga dekada daghan sa mga Pilipino ang nahikawan sa kahigayonan pagserbisyo sa gobiyerno tungod sa kakuwang sa gitas-on.

Husto si Garcia nga dili angayang  himoong sukdanan sa katakos sa usa ka tawo pagserbisyo sa gobiyerno ang iyang gitas-on ug gimub-on.