Ilegal nga sugal wad-on gyud

Wala g’yuy problema nga gibalik ni Presidente Duterte ang operasyon sa Lotto ug Swertres nga direktang gidumala sa mga accredited outlets sa Philippine Charity Sweepstakes Office (PCSO).

Apan kining mga gagmitoy kaayong stalls, nga kon imong higdaon daku-dako ra’g gamay sa lungon ug anaa gibutang daplin sa karsada, angay kini nga wagtangon kay mao kini ang naghimo og mga ilegal.

Ang gipasabot nako mao kanang mga walay direkta nga koneksyon ngadto sa PCSO, ug mailhan nimo kini kay ang ticket nga ihatag kanimo, gisuwat lang og ballpen.

Mao kini ang gitawag og Small Town Lotteries (STL) nga pwerteng pagkatap sa lainlaing bahin sa nasud, ug apil na dinhi sa Sugbo, kay gisuportahan man kini sa mga kurakot nga opisyal sa PCSO.

* * *

Dinhi sa Dakbayan sa Sugbo, angay gyud unta nga si Mayor Edgardo Labella mosuperbisar pag-ayo sa kampanya batok sa ilegal nga mga sugalan, apil na ang illegal swertres, video karera, moli-moli ug uban pa.

Kay mga abogado man ang iyang gipanguha nga nagdumala sa ubay-ubay’ng mga department sa Cebu City Hall, sigurado ko nga nakabasa sila sa mga lagda nga anaa sa Republic Act 8551.

Kun dunay wala makabasa kanila niini, ako silang pahibaw-on nga anaa diha gilatid nga ang mga mayor/local chief executives, maoy gihatagan og tahas sa pagsuperbisar sa kampanya batok sa ilegal nga sugal.

* * *

Dunay mga nagduda nga si Presidente Duterte modeklarar og Martial Law sa Negros Oriental kay mihasi pag-ayo ang subsob nga pagpamatay diha sa maong dapit.

Dunay mga polis nga gi-ambush sa mga rebelde, daghang opisyal sa kagamhanan ang gipangpatay, ug uban pa nga mga krimen. Samtang giestrikto nga pakuhaon gyud og lisensya ang mga gustong mohupot og armas, apan ang mga rebelde igo ra nga nangyam-id niini, ug padayon sila nga nagdala’g armas nga walay lisensya.

Ang uban sa mga armas nga ilang gikalib-ay ug giluklok sa hawak, gipanag-iya sa kagamhanan nga nakuha nila gikan sa mga polis ug sundalo nga ilang gipangpatay.

Busa, husto gyud nga ideklarar ang Martial Law sa Negros. Unsay epekto kun mag-martial law. Mahimo na nga did-an ang mga tawo nga magsuroy-suroy sa lawom na nga gabii.

Sa ato pa, kutob sa mga tawo nga masakpang naglatagaw sa kagabhion, maisip na nga kaaway sa kagamhanan. Sayod kita nga ang mga rebelde, sagad mag-uuma sa adlaw ug rebelde sa gabii.

Ang katawhan dili makabasol ni Duterte kun makahunahuna kini pagdeklarar og martial law, kay sila wala moabag aron ang mga rebelde madakpan sa mga polis ug militar.