Tiga nga palusot
Kinahanglan nga ipasabot sa kadagkoan sa Department of Health (DOH) ngadto sa mga senador ug mga kongresista nganong gipasagdan nila nga nihupas ang minilyon ka pesos nga balor sa mga tambal sud sa mga bodega dinhi sa Sugbo ug sa uban nilang rehiyonal nga mga buhatan.
Gitakda na ang buwag nga mga imbestigasyon sa Senado ug sa House of Representatives sa mga tigtipig sa mga tambal.
Hinaot nga labaw sa pagsalida sa mga magbabalaod mapangitaan na gyod og hupay kining sakit nga matag tuig na lang nga magbalik-balik og takboy.
* * *
Bisan mao na ang nasinati sa nangaging katuigan ug mga pamunoan, makapahibung ang pagdumili sa mga tagduma sa DOH sa pagkat-on sa mga pagtulon-an.
Kay nasakpan sa Commission on Audit (COA) nga, sama sa naandan, gipasagdan ang kinompra nga mga tambal niadtong 2018:
• Kasagaran sa kapin sa P18 bilyones nga balor sa mga tambal nga natanggong sa mga bodega sa DOH hapit na mohupas; ug
• Nihupas na ang kapin sa P30 milyones nga balor sa mga tambal nga gi-apud-apod sa DOH sa nagkalainlain nga mga ospital, health centers ug rehabilitation centers.
* * *
Inay mangayo og pasaylo ug mosaad nga di na usbon, gipasamotan ni Health Secretary Francisco Duque III ang ang ilang atraso pinaagi sa pagtandi sa ilang tinuig nga pagpangompra og tambal sa panginahanglan sa tinuig nga pagbayad og insurance policy:
Sama nga di ta angay nga masuko nga wa mapusli ang insurance sa pagtapos sa tuig, angay sang hangpon ang implikasyon sa wa pagkahurot sa mga tambal nga mao nga di daghan ang nangasakit.
* * *
Way kalainan si Duque sa tig-a nga mga opisyal sa Department of Social Welfare and Development (DSWD) nga niinsistir nga nadugta ang ilang relief goods kay wa maigo sa katalagman ang ilang gibanabana nga gidaghanon sa mga biktima. Nakahimong mas bangis sa palusot nilang Duque ug sa taga DSWD:
• Nadugta ang mga hinabang bisan sa kadaghan sa gipanggutom nga mga biktima nga wa maabti tungod sa sayop nga sistema sa pag-apud-apod; sama nga
• Nihupas ang mga tambal bisan sa kadaghan sa kabos nga masakiton tungod sa pataka nga pagpangompra og mga tambal nga wa kinahanglana ug kapakyas pagtambal sa labing nagkinahanglan.
* * *
- Latest
