Ang tinuod nga paghigugma

Atong ipasiatab nga kita mga tawong mahigugmaon, gani daghan kanato ang nihimo og mga posts niini sa facebook ug ato kining gipadayag diha sa atong mga pulong sa matag higayon nga atong ikaatubang ang tawo nga giisip natong bililhon sa atong kinabuhi.

Apan ang pangutana mao nga sa atong pagpakita sa gugma nahimo ba kitang masinabtanon sa ilang kahimtang?

Basin baya og nahimo silang binilanggo sa imong kaugalingong pagtuo nga ikaw nihatag sa tinud-anay nilang panginahanglan apan sa katapusan imong panginahanglan ra diay ang imong giatiman. 

Kamatuoran kini nga maoy hinungdan kun nganong daghan kanato karon ang nahimong biktima sa kaugalingon natong urom.

Dunay mga higayon nga daw halap ra ang pagtimbaya sa kaugmaon kay padayon kitang nabilanggo sa atong kagahapon. Nahimong shock absorber ang sa mga isyu nato sa kagahapon.

Sa laing bahin nahimong matinud-anon ang usa ka tawo labina kun diha sa paghatag nimo sa imong kaugalingong pag-uyon kun asa siya malipay kay bugtong pinaagi lamang niini nahimong mapakita nimo ang imong pagtahud sa tawhanong kagawasan.

Apan kuyog sa maong pagtahud ang dakong tinguha nga mamahimong manalipud sa maong tawo kun ugaling mahitumpawak sila sa ilang kapakyasan ug kadautan. Angayan lamang nga sila panalipdan. Kay kun dili nimo kini himoon tingali mamahimong dako kaayo ang imong tulubagon.

Sa akong pagsuhid sa akong kinabuhi nahimong kabahin gyud ang gugma ug pagpadayag niini ngadto kang bisan kinsa sanglit kini man ang gikinahanglan sa matag usa regardless sa atong kahimtang ug panlantaw sa kinabuhi. Mao nga ang gugma sa kinabuhi nahimong dugokan sa matag paningkamot.

Busa ihatag kini sa way igong kusmod ug kun ugaling ang gihigugma masayop nan, ihatag ang imong pagsabot.

Sama sa gipakita sa atong Ginoo nga nianhi aron moalgad ug mahigugma sa uban kay siya gugma man ang gugma nga dili gayud hitupngan.