EDITORYAL - Silot kamatayon

Lanog kaayo ang balita bahin sa pagpabalik sa death penalty ilabi na sa mga kasong may kalambigitan sa illegal drugs ug ang pagpangawkaw sa kwarta sa katawhan.

Mismo si Presidente Rodrigo Duterte kaniadto ug hangtud karon gusto gyud nga ibalik ang maong silot sa pagtuong makapamenus kini sa mga krimen ug makapahadlok sa mga sindikato sa drugas ug sa mga kurakot nga opisyal magbuhat sa ilang mga binuang.

Siguradong motingog batok niini ang simbahan ug ang mga human rights advocates. Apan kun makakuha kini og suporta sa mga magbabalaod, walay mahimo ang mga dili gusto niini.

Apan sa pagsugod palang giingong daghang senador na ang mipakita’g bugnaw nga pagtagad tungod ba kaha sa pagapil sa pasilotag kamatayon ang mga mangurakot?

Samtang tuod may epekto kini sa mga kriminal, dili kini garantiya nga makapakgang sa mga krimen.

Usa sa mga hinungdan kun nganong daghan ang mga krimen kini tungod sa kakabus sa mas daghang mga Pilipino.

Gusto sab silang mabuhi apan tungod sa kakuwang sa mga oportunidad nga makatrabaho ug makakobra og arang-arang nga suholan, bisan sa unsang pamaagi, apil na ang paghimo og krimen aron lang makakaon.

Maayo lang sab kini kun ang suspek tinud-anay gyud nga nagbuhat sa salaod nga gipasangil batok kaniya.

Apan unsaon man kun ang masugamak sa inhustisya mao kadtong mga kabus nga walay ikasarang pagkuha og abogadong manalipod kanila sa korte? Sila nga biktima sa kakabus?

Bisan og naa pa kining balaora, kun ang huyang ang implimentasyon sa balaod ug naa pa gihapoy mga abusadong tigpatuman sa balaod, ang mga kabus ra gihapon maoy mahan-okan niini samtang ang mga tinud-anay nga sad-an sama sa mga druglords pirmeng makalingkawas.

Kinahanglang pangusgan ug palig-unon ang sistema sa hustisya sa Pilipinas gikan pa sa law enforcement, paghusay sa mga kaso ug sa pagpahamtang sa hukom aron matawag nga makatarunganon kun duna may mapahamtangan og silot kamatayon.