Ulahi na ang tanan

Usahay ang nagdilaab nga kasuko, kahiubos o uban pang negatibong pagbati maoy hinungdan nganong mabuhat sa tawo ang usa ka law-ayng butang nga dili gyod unta angayng  himoon. Panahon sa kasuko, manglugpad ang mga mahalong plato sa kusina tumong sa sementadong bungbong ug mangapusgay patighulog sa gisakitang salog nga nasamad sa mga mitugpang hait nga tipaka.

Apan paglurang sa kasuko, dihang mahibalik na ang normal nga katin-aw sa atong panan-aw, didto pa ta makaamgo nga usa diay ka dakong sayop ang atong gibuhat. Kay diay, may tam-is handomanan kini sa atong kinabuhi. Busa, gipamunit nato ang mga tipaka kay gustong hulmahog balik ngadto sa orihinal niining panagway.

Pero, mabalik pa kaha?

Ingon niini ang nahitabo ni kanhi Cebu City Mayor Tommy Osmeña. Human niya ipaguba ang matahom nga opisina sa City Hall nga nagdugtong sa iyang kasingkasing ug sa katawhan, gusto siya nga ipaayo kinig balik sa unsay hitsura niini niadtong unang adlaw sa iyang paglingkod isip amahan sa lungsod.

Mipadala siyag sulat, pinetsahag Hulyo 18, 2019 ngadtong Mayor Edgar ‘Ed’ Labella nga nagpadayag sa iyang dakong tinguha sa pagpahiuli sa orig nga kaanyag sa city mayor’s office nga iyang gipahilabtan. Gihangop ni Ed ang maong hangyo. Apan adunay nakababag. Ania:

“Had the letter been sent immediately or the day after when cases had not been filed at the Ombudsman, then it would be appropriate to perhaps, consider.” Pamahayag ni Ed.

Usab, gitugyan ni Labella sa iyang abogado, City Legal Officer Rey Gealon, ang maong isyu, kinsa mipasabot: ‘nga ang pagpahiuli sa City Mayor’s office sama ra nga sila nahimong sagabal o obstruction of justice nga klaro kaayong nalatid sa Section 1(b) sa Presidential Decree 1829.’

Ning maong situwasiyon, gipakita ni Labella nga siya kaantigo mosabot ug maluoy. Andam siyang modawat sa hangyo ni Tommy, nga mao ang pag-alim sa samad sa kasingkasing sa city hall ug katawhan nga kanhi iyang gipasakitan.

Apan ulahi na ang tanan. Nasumiter na ang sumbong batok kang Osmeña ngadto sa Ombudsman. Dili na kini mabawi. Ug maglisod na pagtando si Ed sa giyangongo ni Tommy nga wala na sa tukmang panahon. Kay basin bayag mosumbalik nila ang kasong ilang gisang-at.