EDITORYAL - Nihit ang alternatibong dalan

Kapin sa 200 ka mga illegal nga mga estrakturang gitukod diha sa M.L. Quezon Boulevard sa Barangay Ermita sa Dakbayan sa Sugbo ang nawagtangan og panginabuhian ug ang uban pinuy-anan tungod sa pagpa-demolis kanila sa dakbayan. Ang maong karsada iya sa gobiyerno sanglit national road kini ug angay unta kaagian og mga sakyanan ug dili pinuy-anan o negosyo.

Daghan ang gipangtukod nga mga balay-balay nga gihimong internetan, tindahan, kan-anan ug gihimo gyung balay katulganan.

Dunay mga nagbagulbol tungod kay nakalitan sa paspas kaayong implimentasyon kay ang uban nagtuong madugay-dugay pa kini mao nga ang resulta daghan kanila ang wala gyud kapangandam.

Subo man kaayong tan-awon ang ingon niini nga mga talan-awon apan gikinahanglan kining buhaton alang sa kaayohan sa mas kinabag-an.

Ang kinabag-an mao ang mga motorista ug ang publikong nagkinahanglan mogamit sa maong dalan ilabi na sa peak hours. Kini tungod kay ang mga pribadong sakyanan ug mga pasaheroan lakip na ang mga sakyanang nagdala og mga produkto padung sa mga nagdaiyang establisamento mag-abot man sa pipila ka mga dalan.

Usa sa mga hinungdan sa paghuot sa trapiko karon sa siyudad sa Sugbo mao ang kakuwang sa mga alternatibong karsada nga maagian unta sa mga pribadong mga sakyanan ug uban pang dili pasaheroan.

Usa na niini kining M.L. Quezon nga tungod kay namungingi na sa mga illegal nga estraktura, pangulbaan na ang mga motorista nga moagi kay dunay mangasuko kay lagi daw maistorbo ang ilang gipanghimo.

Gawas nga huot tungod sa mga estraktura ug mga lamesa sa mga vendors, daghan pa gyung mga bata nga magdagandagan sa dalan ug kuyawan ang mga drayber kay basin duna silay mabanggaan. Ang nakaayo niini, si Mayor Edgardo Labella diplomatikong nipasabot kanila sa hinungdan. Hinuon, mas maayo kini tungod kay gi-relocate man sila dili layo sa maong dapit ug didto legal silang makapaninda apan wala na kadtong internetan ug ilang katulganan. Sinabtanay lang.